Qazaqstandaǵy karantin sharalary Nur-Sultan men Almaty ekologiialaryna qalai áser etti? Bul suraqqa Ekologiia, geologiia jáne tabiǵi resýrstar vitse-ministri Ahmetjan Pirimqulov jaýap berdi, dep habarlaidy QazAqparat.
«Oblys ortalyqtary men qalalardyń bárinde «Qazgidromet» kúndelikti monitoring júrgizilip otyrady. 20 naýryzdan, iaǵni karantinniń alǵashqy kúninen bastap ministrlik qoǵam ókilderimen birge Almaty men Nur-Sultan qalalarynda atmosferalyq aýaǵa monitoring júrgizdi. Taldaý jumystary kórsetip otyrǵandai, Almatynyń tómengi bóliginde PM 2,5, PM10 ólshemdi bólshekteri boiynsha kontsentratsiianyń artqany baiqalady. Bul lastaný jaǵdaiy JEO-2, JEO-3 jumysyna tán sipat. Alaida qalanyń joǵary bóliginde azot oksidi, azot dioksidiniń tómendegeni baiqalady. Fenol kontsentratsiiasy ótken jylǵa qaraǵanda 60 ese tómendegeni baiqalady. Bul degenińiz avtokólikten bólingen qaldyqtyń azaiǵanyn kórsetedi», - dedi Ahmetjan Pirimqulov OKQ-da onlain rejimde ótken baspasóz máslihatynda.
Vitse-ministrdiń aitýynsha, elordada avtokólikten bólinetin qaldyq mólsheri de azaiǵan.
«Alaida JEO sekildi iri óndiristik kásiporyndardyń jumysy jalǵasýda. Olardan shyǵatyn qaldyq barshylyq», - dedi ol.
Ahmetjan Pirimqulovtyń sózine qaraǵanda, JEO-2, JEO-3 óndiris oshaqtaryn gazǵa aýystyrý, tazartý qurylymdaryn ázirleý, jasyl alańdardyń aýmaǵyn keńeitý týraly Almaty ákimdigimen birlesken Jol kartasy ázirlenýde.
