Áleýmettik jelilerde shymkenttik politsiia qyzmetkerleriniń toida júrgeni túsirilgen video jariialandy. Keiinnen bul toidyń 12 maýsym kúni Túrkistan oblysy Tólebi aýdanyndaǵy demalys aimaǵynyń birinde ótkeni anyqtalǵan, dep habarlaidy "Ult aqparat".
Áleýmettik jelige taraǵan kóriniste qyz uzatý toiyna kelgen qonaqtardyń dastarhan basynda otyrǵany, sýretke túskeni jáne bilep júrgen kezi túsip qalǵan. Sondai-aq, «Qurmetti ministr myrza! Bul qalai bolǵany? Politsiia qyzmetkerlerine koronavirýs juqpai ma? Álde karantin júrmei me? Tólebi aýdanyndaǵy taý bókterinde birqatar atqaminer politsiia qyzmetkerleri jumysty qoiyp, karantinge qaramai toi toilaýda. Onyń biri - politsiia oqý ortalyǵynyń bastyǵy Tileýberdiev, Shymkent qalasy politsiia kúzet bastyǵy Pirmetov, Shymkent qalasy basqarma bastyǵy Omarov jáne taǵy basqa politseiler bar. Osy videony kórip, ózińiz durys baǵa berer dep oilaimyn» dep jazylǵan.
Bul video boiynsha Shymkent qalalyq PD tiisti tekserý júrgizgen.
«Atalǵan fakti boiynsha qyzmettik tergeý júrgizildi. Tekserý barysynda toi 12 maýsym kúni Túrkistan oblysy Tólebi aýdanyndaǵy demalys aimaǵynda karantin kezinde uiymdastyrylǵany belgili boldy. Saltanatty is-sharaǵa Shymkent qalasy politsiia departamentinde jumys istep júrgen qyzmetkerleriniń biri, sondai-aq oqý ortalyǵynyń jáne óńirlik mamandandyrylǵan kúzet qyzmeti basqarmasynyń bastyqtary qatysqan. Toiǵa qatysqan barlyq laýazymdy tulǵalar memlekettik qyzmetshiniń etikalyq kodeksin buzǵany úshin tártiptik jaýapkershilikke tartyldy» delingen habarlamada.
Al, toi ótkizgen demalys aimaǵyna ákimshilik hattama toltyrylyp, tiisti aiyppul salynǵan. Túrkistan oblystyq PD baspasóz qyzmetiniń málimetinshe, jinalǵan materialdar tiisti sheshim qabyldaý úshin Tólebi aýdandyq sotyna joldanǵan.
«Beinetúsirilimdi zerdeleý barysynda Ákimshilik quqyq buzý kodeksiniń 462-babynyń 3-bóligi buzylǵany anyqtaldy. Sanitar dárigerler demalys aimaǵynyń ákimshiligine qatysty QR ÁQBK 462-baby 3-bólimi boiynsha ákimshilik hattama toltyrdy. Qonaqtarmen jáne is-sharany uiymdastyrýshylarmen sanitarlyq-epidemiologiialyq erejelerdi saqtaý qajettiligi týraly profilaktikalyq áńgime ótkizildi» delingen politsiia departamentiniń habarlamasynda.
