27 tamyz, saǵat 09.00-degi jaǵdai boiynsha Qazaqstanda 2 mln 390,9 myń adam bir rettik tólem aldy, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, atalǵan tólem el turǵyndaryna aǵymdaǵy jylǵy shildede engizilgen shekteý sharalary kezinde tabysynan aiyrylǵany úshin Memlekettik áleýmettik saqtandyrý qorynan (budan ári – MÁSQ) bólingen.
«Birjolǵy tólem taǵaiyndaýǵa azamattardan 2 mln 599 myńnan astam biregei ótinish qabyldandy. Tólem mólsheri eń tómengi jalaqyǵa, iaǵni 42 500 teńgege teń. Tólemdi 2 mln 390,9 myń qazaqstandyq aldy, onyń ishinde 2 mln 384,2 myń adam tamyz aiynda karantinniń uzartylýyna bailanysty 0,5 eń tómengi jalaqy mólsherinde nemese 21 250 myń teńge qosymsha aqy aldy. Osy baǵyttaǵy jumystar jalǵasýda», - delingen habarlamada.
Baspasóz qyzmetiniń málimetterine qaraǵanda, MÁSQ-tan tólem alýǵa ótinimder birneshe arna arqyly qabyldanady. 2 mln 599 myńnan astam ótinimniń ishinde:
– 834,5 myń adam proaktivti formatta tólem taǵaiyndaýǵa kelisim bergen;
– 685,4 myń adam Egov.kz portaly jáne telegram-bottar arqyly;
– 413 myń adam 42500.enbek.kz portaly arqyly;
– 665,8 myń adam ekinshi deńgeidegi bankterdiń mobildik qosymshalary men internet-resýrstary arqyly;
– 0,5 myń adam shtabtar arqyly ótinish bergen.
Azamattardyń sanattary bólinisinde:
– 834,5 myń ótinish biryńǵai jiyntyq tólem tóleýshilerden kelgen (proaktivti formatta);
– 268,9 myń ótinishti jaldamaly qyzmetkerleri úshin jumys berýshiler bergen;
– 1 mln 496 myń ótinish azamattardyń basqa sanattarynan kelip tústi (jeke kásipkerler, jeke praktikamen ainalysatyn adamdar, azamattyq-quqyqtyq sipattaǵy sharttar boiynsha tabys alatyn jeke tulǵalar).
Tólem 2 mln 393,4 myń adamǵa taǵaiyndaldy. Qarajat 2 mln 390,9 myń qazaqstandyqqa aýdaryldy.
«Buǵan deiin habarlanǵandai, Qazaqstan aýmaǵynda karantinniń 2 aptaǵa sozylýyna bailanysty MÁSQ-tan birjolǵy tólem alýshylarǵa 0,5 ETJ – 21 250 teńge mólsherinde qosymsha aqy tólenedi. 2020 jyldyń shildesinde MÁSQ-tan birjolǵy tólem alǵan qazaqstandyqtarǵa karantinniń uzartylýyna bailanysty qosymsha aqy avtomatty túrde taǵaiyndalady. Qaita ótinish berýdiń qajeti joq. Karantin uzartylǵannan keiin birjolǵy tólem taǵaiyndaýǵa alǵash ret ótinish bergen azamattarǵa tólem 1,5 ETJ nemese 63 750 teńge (42 500 + 21 250 teńge) mólsherinde taǵaiyndalady. Ótinish qabyldaý 2020 jyldyń 1 qyrkúiegine deiin jalǵasady», - dep málimdedi ministrliktiń baspasóz qyzmeti.
