Almatyda Eńbek, áleýmettik qorǵaý jáne kóshi-qon komiteti departamentiniń basshysy Aidynjan Narmatov karantin kezinde múgedekterdiń mártebesi qalai aiqyndalatynyn aitty, dep habarlaidy QazAqparat.
«QR Eńbek jáne halyqty áleýmettik qorǵaý ministriniń 2020 jylǵy 25 naýryzdaǵy № 109 buiryǵymen Tótenshe jaǵdai kezeńinde múgedektigi boiynsha memlekettik áleýmettik járdemaqyny jáne eńbek etý qabiletinen aiyrylý jaǵdaiynda áleýmettik tólemdi júzege asyrý tártibiniń erekshelikteri belgilendi. Tótenshe jaǵdai kezeńinde memlekettik qyzmetterdi kórsetý «Elektrondyq úkimet» veb-portalyndaǵy «Elektrondyq ótinish» servisi arqyly elektrondyq ótinish negizinde júzege asyrylyp jatyr. Sondyqtan da meditsinalyq-áleýmettik saraptama bólimine barýdyń qajeti joq, memlekettik qyzmet syrttai júrgiziledi», - dedi Aidynjan Narmatov.
Sonymen qatar, ol tótenshe jaǵdai kezeńinde múgedektikti nemese eńbek etý qabiletinen aiyrylý dárejesin belgileý nemese qajetti áleýmettik qorǵaý sharalaryn aiqyndaýda memlekettik qyzmetti kórsetý tártibiniń erekshelikterin atady.
«Múgedektikti nemese eńbek etý qabiletinen aiyrylý dárejesin nemese qajetti áleýmettik qorǵaý sharalaryn belgileý meditsinalyq-áleýmettik saraptama júrgizý qaǵidalaryna sáikes kýálandyrylatyn adamdy múgedektik belgilengen kúnnen bastap alty ai ishinde baqylap, tekserip, bir jyldan aspaityn merzimge syrttai júrgizedi. Qaita kýálandyrý merzimi tótenshe jaǵdai engizilgenge deiin bir aidyń ishinde jáne tótenshe jaǵdai ýaqytynda kelgen adamdarǵa múgedektiktiń, jalpy eńbek etý qabiletinen aiyrylý, kásiptik eńbek etý qabiletinen aiyrylý dárejesiniń jáne múgedekti ońaltýdyń jeke baǵdarlamasynyń merzimderi tótenshe jaǵdai oryn alǵan kezeńde avtomatty túrde uzartylady.
Múgedektigi boiynsha memlekettik áleýmettik járdemaqy jáne (nemese) eńbek etý qabiletinen aiyrylý jaǵdaiyna áleýmettik tólem alýshylar bolyp tabylatyn adamdarǵa tótenshe jaǵdai kezeńinde tólemder budan buryn belgilengen múgedektik tobyna jáne (nemese) jalpy eńbek etý qabiletinen aiyrylý dárejesine sáikes tótenshe jaǵdai rejimi aiaqtalǵan aidy qosa alǵanǵa deiin tólenedi», - dedi Eńbek, áleýmettik qorǵaý jáne kóshi-qon komiteti departamentiniń basshysy.
Munyń aldynda spiker Almatyda 589 myńnan asatyn adamnyń zeinetaqy men járdemaqysyna ústemeaqy qosylatynyn aitqan bolatyn.
