QR IIDM Azamattyq aviatsiia komitetiniń tóraǵasy Talǵat Lastaev halyqaralyq áýe reisterin jandandyrýǵa qatysty túsinik berdi, – dep habarlaidy QazAqparat.
«Qazaqstan aýmaǵynda koronavirýs infektsiiasy taralýynyń aldyn alý boiynsha vedomstvoaralyq komissiianyń otyrysynda Syrtqy ister ministrligi men Densaýlyq saqtaý ministrligine birlese otyryp, birneshe halyqaralyq áýe baǵyttaryn qaita ashý boiynsha jumys júrgizýge tapsyrma berildi. Sonyń ishinde birinshi kezeńde COVID-19 boiynsha epidemiologiialyq jaǵdaiynyń klassifikatsiialyq deńgeiine sáikes, Ońtústik Koreia, Qytai jáne Ázerbaijan kirdi. Biz atalǵan memleketterdiń aviatsiialyq basqarmalarymen áýe reisterin jandandyrý múmkindigin endi pysyqtaýdy bastap jatyrmyz», - dedi T. Lastaev Ortalyq kommýnikatsiialar qyzmetindegi baspasóz máslihatynda.
Onyń sózine qaraǵanda, ekinshi kezeńde epidemiologiialyq qaýipsizdik deńgeiine bailanysty Túrkiia, BAÁ, Germaniia, Tailand jáne Chehiia qarastyrylady.
«Atap óter jait, bul reister erteńnen bastap ashylmaidy. Olar epidemiologiialyq jaǵdaiǵa bailanysty jáne barlyq instantsiialarmen kelisý dárejesine qarai jandanady. Reisterdiń naqty ashylýy kúni týraly qosymsha habarlaimyz», - dedi Talǵat Lastaev.
