Nur-Sultan qalasynyń ákimi Altai Kólginov elordalyqtarǵa úndeý joldady, dep habarlaidy "Ult aqparat" qala ákiminiń baspasóz qyzmetine silteme jasap.
«Qurmetti elorda turǵyndary! Koronavirýs pandemiiasy álem boiynsha jyldam taralyp keledi. Osylardy eskere otyryp, bizdiń elde de qatań sharalar qabyldandy. Birinshiden, biz ózge elderdiń tájiribelerin qaradyq. Dúniejúzilik densaýlyq saqtaý uiymy aýyrǵan bir adam keminde 2-3 adamǵa juqtyratynyn málimdedi. Al 5-6 kúnniń ishinde aýyrǵan bir adam 3,5 myń adamnyń dertti bolýyna sebep bolady.
Eýropa qalalary birinen keiin biri karantinge jabylyp jatyr. Olardyń keibireýleri sheshimdi tym kesh qabyldaǵanyn kórip otyrsyzdar. Al virýs alǵash tirkelgen Qytai, kúresti temirdei tártiptiń negizinde júrgizdi. Qytai, Ońtústik Koreia elderi azamattardy oqshaýlaýdyń qatań ádisin qoldandy. Mekemeler, kásiporyndar, qoǵamdyq kólikter jumystaryn toqtatty. Olar kúndep emes, ailap úilerinen shyqpady. Tek osyndai tártip qana meditsina qyzmetkerlerine úlken kómek boldy jáne oń nátije berdi. Bizdiń elimizde de is-sharalar der kezinde qolǵa alynyp, Tótenshe jaǵdai jariialandy. 22 naýryzdan beri elordaǵa kirýge de, shyǵýǵa da tyiym salyndy. Bunyń bári sizderdiń qaýipsizdikterińiz úshin qabyldanǵan sheshim.
Ekinshiden, sheteldik tájiribe kórsetkendei, bul indetti jasy úlken, sozylmaly dertteri bar azamattar kótere almai jatyr. Sondyqtan biz qazynaly qariialarymyzdyń amandyǵyn oilaýymyz qajet. Ásirese jasy úlken azamattarymyzdyń syrtqa shyqpaýyn ótinemiz. Sabyr túbi sary altyn. Qiyn kezeńde ózderińiz úshin tózimdilik tanytyńyzdar. Basqa jol joq. Osy kúnderi baiqaǵanymyz jaǵdaidy kópshilik túsinip otyr, rahmet aitamyz. Biraq áli osy qaýipti tereń sezinbegen azamattar da bar. Dál qazir týysyńyz ben jaqynyńyzǵa shyn janashyr bolsańyz, olardyń amandyǵyn tileseńiz, onda óz úiińizde otyrýyńyz kerek.
Úshinshiden, qala mańyndaǵy karantinge kirmeitin eldi meken turǵyndary elordaǵa kelýdi qoia turý qajet. Biz jumys berýshilerge qyzmetkerleriniń amandyǵy úshin, jumysty toqtatýdy jáne jumys oryndarynyń saqtalýy qajettigin aittyq. Tórtinshiden, tártip máselesi. Tártipke baǵynǵan qul bolmaidy deidi. Mundai kezeńde zańbuzýshylyqtarǵa jol berilmeidi. Kez kelgen zańsyzdyq qatań jaýapqa tartylady.
Besinshiden, búgin Memleket basshysy ekonomikany, shaǵyn jáne orta biznesti, áleýmettik az qamtylǵan toptardy qoldaýǵa, jumyspen qamtýǵa baǵyttalǵan sharalar qabyldady. Biznes ókilderi óz kezeginde jumys oryndaryn qysqartpaýlary qajet. Elbasynyń Úndeýinen keiin el azamattary úlgi bolyp arnaiy qorǵa aqsha aýdaryp jatyr. Osy Úndeýge sáikes, biz Nur Otan partiiasymen birge birinshi kezekte kómekke muqtaj azamattarǵa kómektesýdi bastap kettik.
Karantin men koronavirýsqa qatysty suraqtaryńyz bolsa 109 nomerine habarlasýyńyzǵa bolady. Ol jerde qosymsha telefon ortalyǵyn ashtyq. Karantin erte aiaqtalsyn desek, tártipke baǵynyp, jaýapkershilikti tereń sezinýimiz kerek. Biz bul qiyndyqty birge eńseremiz. Biz birgemiz», - dedi qala ákimi Altai Kólginov.
