Oqý jylynyń basynan beri Nur-Sultanda barlyǵy 105 mektep tekserildi, onyń 89-y memlekettik, 16-sy jekemenshik, dep habarlaidy ákimdiktiń resmi saity. Sondai-aq 29 balabaqsha (10 memlekettik jáne 19 jekemenshik) tekserildi. Bul týraly "Ult aqparat" ákimdikke silteme jasap habarlaidy.
Birqatar mektep aldy jáne jalpy bilim beretin mektepterde buzýshylyqtar anyqtalyp, kemshilikter der kezinde retteldi.
Eske sala keteiik, elordalyq balabaqshalar kezekshi toptar rejiminde jumysyn jalǵastyrýda. Búginde olardyń 1649-y memlekettik jáne jeke mekemelerde ashyldy, jalpy kontingenti 25 myńǵa jýyq balany quraidy.
«Barlyq nysandar sanitarlyq talaptarǵa sáikes jumys isteidi. Balalardyń mektepke deiingi uiymǵa barýy ata-ananyń kelisimi negizinde júzege asyrylady. Ol bolmaǵan jaǵdaida bala karantin kezeńinde mektepke deiingi uiymda óz ornyn saqtaidy», - dep atap ótti bilim basqarmasy.
Sondai-aq, mektepterde ata-analardyń qalaýy boiynsha sanitarlyq erejelerge sáikes 1-4 synyptar úshin kezekshi toptar uiymdastyrylady. Barlyǵy elordada 3011 kezekshi synyp bar, oǵan 40 400 oqýshy qabyldandy.
Kezekshi synyptar qyzmeti sanitarlyq epidemiologiialyq talaptardy qatań saqtai otyryp júzege asyrylady. Ata-analar balalardy oqý kúni bastalǵanǵa deiin mekemeniń aldyńǵy esikterine ertip barady jáne sabaq aiaqtalǵannan keiin olardy kire beriste qarsy alady. Áleýmettik araqashyqtyqty saqtaý úshin mektepterde belgiler qoiylady. Synyptar ár sabaqtan soń jeldetilip, kvartspen óńdeledi.
«Búgin №66 mektep-litseiiniń barlyq sanitarlyq talaptarǵa sai ekeni tekserildi. Balalardy qabyldaý kezinen bastap dezinfektsiialyq jumystar júrgiziletinin baiqadyq. Iaǵni balalar qoldaryn antiseptikpen óńdep baryp, mektep qabyrǵasyna kiredi. Meditsina qyzmetkeri dálizden termometriia júrgiziledi. Onyń kórsetkishi tirkelip otyrady. Balalar araqashyqtyqty saqtap, kabinette otyrady. Bir toptaǵy siymdylyq -15 adamnan aspaidy. Árbir kabinettiń aldynda sanitaizer ornalastyrylyp, antiseptikter quiylǵan. Muǵalimderdiń barlyǵy maska taǵý rejimin saqtap júr», - deidi №66 mektep litsei direktorynyń bastaýysh synyptar boiynsha oqý-tárbie jumysy jónindegi orynbasary Janna Jýkeshbaeva.
«Ár bala dálizde araqashyqtyqty saqtaidy, árkim sý ishetin ydysyn ózi alyp keledi. Balalarǵa basynda nusqaýlyq berildi, ár bala talaptardy qatań saqtap úirendi», - dedi Nur-Sultan qalasynyń taýarlar men qyzmetter sapasyn men qaýipsizdigin baqylaý departamentiniń bas mamany Laýra Asanbaeva.
