Túrkistan oblysynda karantinge qaramastan jasalǵan týǵan kún men túlekter otyrysy anyqtaldy, dep habarlaidy "Ult aqparat".
Koronavirýs indetiniń taralýyn boldyrmaý, aldyn alý maqsatynda Túrkistan oblysynda mobildik toptar qurylyp, qyzmet atqarýda.
Mobildi top quramynda tártip saqshylary da bar. Osyndai kezekti tekseris kezinde Arys qalasy Saiajai eldi mekeninde ornalasqan demalys ornynda týǵan kún bolyp jatqanyn anyqtady.
Tekserý barysynda jiynda 50-den astam qonaq bolǵan.
Osyǵan bailanysty sanitariialyq talaptardy saqtamaǵan demalys ornynyń iesi men týǵan kún iesine QR ÁQBtK 425-babymen is-qujattary rásimdeldi.
Jinaqtalǵan qujattar ákimshilik shara kórilý úshin sanitariialyq-epidemiologiialyq baqylaý basqarmasyna joldandy.
Sonymen qatar tártip saqshylary Arys qalasyndaǵy Táýelsizdik kóshesindegi úilerdiń birinde bolyp jatqan túlekter otyrysyn anyqtady.
Mektep bitirýshi oqýshylardyń qoshtasý keshine 50-ge tarta qonaq kelgen.
Karantin talaptaryn saqtamai, adamdardyń kóptep shoǵyrlanýyna jol bergen úi iesine qatysty QR ÁQBtK 425-baby boiynsha is-qujattar jinaqtalyp, zańdy sheshim qabyldaý úshin Arys aýdandyq SEBB-ǵa joldandy.
Jalpy jyl basynan beri Arys aýdanynda 100-den astam karantin talabyn saqtamaǵandar anyqtalǵan.
Onyń ishinde 15-i týǵan kún, toi-jiyn ótkizý derekteri boiynsha tirkelgen.
Túrkistan oblysynyń politseileri barlyq azamattardy koronavirýs indetine bailanysty shyǵarylǵan qaýly talaptaryn saqtaýǵa shaqyrady.
«Áleýmettik araqashyqtyqty saqtap, betperde rejimin ustanyńyzdar. Adam kóp bolatyn jerlerge barmańyzdar» dep keńes beredi politsiia.
