Almatyda koronavirýs taralýyna bailanysty sońǵy aptada jolaýshylar aǵymy 64%-ǵa tómendedi, dep habarlaidy "Ult aqparat".
Qalalyq mobildilik basqarmasynyń sheshimimen karantin rejimi kezinde Almaty qalasyndaǵy qoǵamdyq kólik, atap aitqanda avtobýs marshrýttary men metropoliten shtattyq rejimde jumys isteidi.
«Alaida almatylyqtardy erkin tasymaldaý úshin avtobýstar josparly túrde 95% jolǵa shyǵyp júr. Qalaaralyq jáne qala mańy marshrýttary karantin kezine jumystaryn ýaqytsha toqtatty. Sońǵy apta ishinde jolaýshylar aǵymy 64%-ǵa tómendegen», - dedi basqarmadan.
Sonymen qatar, Shyǵys Qazaqstan, Túrkistan, Qyzylorda, Soltústik Qazaqstan jáne Almaty oblysy baǵyttaryndaǵy 49 qalaaralyq marshrýt, sondai-aq qala mańynan qatynaityn 63 turaqty qala jáne qala mańy marshrýty, jalpy 759 avtobýs ýaqytsha toqtatyldy. Qazirgi rejimge sáikes qala syrtymen ótetin 6 turaqty qala marshrýtynyń syzbalaryna ózgeris engizildi (14, 16, 52, 115, 124,125, 208)
Avtobýstardy dezinfektsiialaý úshin sanitarlyq óńdeýmen ainalysatyn eki kompaniiamen kelisim jasaldy. Olar barlyq avtoparkterdegi avtobýstardy túngi ýaqytta dezinfektsiialaýmen ainalysady. Kúndiz sońǵy aialdamalarda jyljymaly sanitarlyq óńdeý beketteri jumys istep jatyr.
Metropoliten jumysy boiynsha, qazirgi kezde jolaýshylar aǵymy 70%-ǵa tómendedi. Alaida metro jumysy shtattyq rejimde jalǵasýda. Depolarda vagondar tolyq dezinfektsiialanady.
