Karantin kezinde kóptegen sala qalypty jumys sarynynan jańylǵany ras. Onyń ishinde meditsina salasy bar. Atap aitqanda, kezek kúttirmeitin, shuǵyl meditsinalyq kómekkke muqtaj azamattar úshin pandemiia aiasynda kómek alý úlken qiyndyq týǵyzdy.
Qalanyń barlyq naýqastaryna kardiologiialyq kómek kórsetetin Almaty qalalyq kardiologiialyq ortalyǵyna qazir aǵylyp jatqan adam kóp.
Bireýler júregin kórsetýge kelse, ekinshileri josparlanǵan emin jalǵastyrýǵa kelip jatyr. Sebebi oǵan deiin bul naýqastar karantin kesirinen aýrýhanaǵa kele almady.
«Karantin kezinde kóp adam kelýge qoryqty. Aýyryp tursa da, jaǵdaiy qiyn bolsa da. Úiden emdelýge tyrysty. Sondyqtan bolar, bizde karantin 4 aiynda qaralǵan adam sany ádettegiden az boldy», - dedi ortalyq direktory Almat Qodasbaev.
Karantin kezinde ortalyqta ádettegi 6 bólimsheniń 2-ǵana istep turǵan.
Qalǵan 2 bólimshe provizorlyq ortalyq siiaqty jasaqtalyp, koronavirýs infektsiiasy bolýy yqtimal degen naýqastardy, qyzýy joǵary adamdardy qaraýǵa qaita jasaqtalǵan. Dárigerlerge, meditsinalyq qyzmetkerlerge únemi qorǵanys quraldaryn kiip júrýge, qorǵanys kiimimen ota jasaýǵa týra kelgen.
Tótenshe jaǵdai jariialana salysymen ortalyqqa shuǵyl kelgen adamdardan PTR taldaý qabyldaýǵa múmkindik bolmaǵan kezder bolǵan. Dárigerler tek belgili bir ýaqyttan keiin virýs juqtyrǵan-juqtyrmaǵanyna kóz jetkizip otyrǵan. Olarǵa belgisiz nársemen betpe bet kelýge týra keldi.
«Naýqastardy PTR taldaýyn tekserip jatýǵa ýaqyt bolmaidy. Shuǵyl túsken adamǵa shuǵyl ota jasala beredi. Kardiologiialyq kómek kórsete otyryp, koronavirýsqa PTR taldaý jasai beremiz. Nátijesin 10-12 saǵattan keiin bilgen kezder boldy.
4 ai karantin kezinde ortalyqqa emdelýge kelgen 14 adamnan koronavirýs shyqqan. Onyń ishinde 10 patsientke shuǵyl túrde koronarografiia jasaldy. 4 patsientke odan kúrdelirek ota jasaldy. Eń egde patsient 80 jasta boldy. 2 adam gipoksiia jaǵdaiynda júrek jumysyn jaqsartý maqsatynda ekstrakorporaldy membranalyq oksigenator apparatyna qosyldy. Ol kisilerde ottegi mólsheri óte tómen kórsetip turdy. Naýqastar uzaq ýaqyt arnaiy apparatqa qosylyp jatty», - dedi Almat Qodasbaev.
Qazir ol naýqastardyń barlyǵy ortalyqtan shyǵyp, arnaiy profildik infektsiialyq aýrýhanalarǵa jiberilgen.
Onyń aitýynsha, sońǵy 4-5 kúnde koronavirýs infektsiiasy rastalǵan patsient túspedi.
Ortalyq mamandary infektsiialyq gospitalderge 370 ret konsýltatsiiaǵa shyqqan.
Álbette, júrek qan tamyrlary patologiiasy bar adamdarǵa virýs juqqan jaǵdaida jaǵdaiy ýshyǵýy yqtimal.
«Júregi aýyratyn adamdarda virýstyq aýrýlar aýyr ótedi. Sebebi, júieli túrde qabyný protsesi, virýstyń júrek kletkalaryna toksindik yqpaly arta túsedi. Buryn ota jasatqan adamdar da saq bolýy kerek. Júrek aqaýy bar adamdarǵa halyqaralyq usynystar bar. Qabyldap jatqan dárilerdi toqtatýǵa bolmaidy. KOVID jaǵdaiynda infektsionister kóbirek sý ishýge keńes beredi. Al júrek aqaýy bar keibir naýqastarǵa sý ishýge kerisinshe bolmaidy. Onsyz da júrektiń jiyrylý qabyleti tómen adamdarǵa artyq sý keri áser etedi. Ondai kezde mindetti túrde kardiologpen keńesý kerek. Maily tamaq jeý de júregi aýyratyndarǵa aýyr keledi. Al qan suiyltatyn antikoagýlianttar kerisinshe oń yqpal beredi. Ony esh kedergisiz jalǵastyrýǵa bolady. Antibiotikterdiń keibirin júrek emes, baýyr men búirek jetkiliksizdigi kezinde qoldanýǵa bolmaidy», - dedi A.Qodasbaev.
Jaǵdaiy óte nashar virýsqa qarsy terapiiany júregi de, ókpesi de kótere almaityn naýqastar EKMO apparatyna qosylady. Birneshe kún boiy es-tússiz jatqan adamnyń júregi men ókpesiniń fýnktsiiasyn osy apparat atqarady.
Osyndai apparat ortalyqta bireý ǵana. Qala boiynsha taǵy 4 meditsinalyq ortalyqta EKMO apparaty bar.
