Foto: t.me/ladakz
Mańǵystaýdaǵy Qarakól kólinde 870-ke jýyq aqqýdyń óleksesi tabyldy. Ekologtar sý qoimasynda lastaýshy zattardyń shamadan tys asyp ketkenin aityp dabyl qaǵyp otyr, - dep habarlaidy Sputnik Qazaqstan saity Lada.kz portalyna silteme jasap.
Mańǵystaý oblysynyń qoǵamdyq kommýnikatsiialar ortalyǵynda ótken brifing barysynda sarapshylar, ekobelsendiler, sondai-aq oblystyq orman sharýashylyǵy jáne janýarlar dúniesi aýmaqtyq inspektsiiasynyń ókilderi qustardyń qyrylýyna qatysty málimdeme jasady.
Ótken jyldyń 21 jeltoqsanynan 2024 jylǵy 9 qańtar aralyǵynda barlyǵy 870 aqqýdyń óleksesi tabyldy. Qarakól kóli kún saiyn tekserilip jatyr. Oblystyq orman sharýashylyǵy jáne janýarlar dúniesi aýmaqtyq inspektsiiasynyń basshysy Ǵabbas Dosatov Qazaqstannyń bioalýantúrliligin saqtaý qaýymdastyǵynyń ornitologtary júrgizgen zertteý nátijesin kútip otyrǵanyn aitty. Bastapqy zertteýlerdiń nátijeleri aqqýlardyń qus tumaýynan qyrylǵanyn anyqtady.
"Qarakól kóli – respýblikalyq mańyzy bar erekshe qorǵalatyn tabiǵi aýmaq. Qoryqty qorǵaý jumystaryn Ústirt memlekettik tabiǵi qoryǵy júrgizedi. Qoryq inspektorlary aqqýlardyń ólgeni týraly jedel túrde tiisti organdarǵa jetkizgen. Budan ári óńirge QR aýyl sharýashylyǵy ministrligi veterinariialyq baqylaý jáne qadaǵalaý komiteti janyndaǵy ulttyq ortalyqtyń jáne Almaty mikrobiologiia jáne virýsologiia institýtynyń mamandary keldi. Olar qustardyń ólekselerine taldama jasap kórdi jáne qus tumaýy nusqasy rastaldy. Osyǵan bailanysty tiisti memlekettik organdar óz quzyreti sheńberinde qustardyń óleksesin jinaýmen jáne joiýmen ainalysty", - dedi Dosatov.
Sonymen qatar, Rixos qonaq úii de tekserildi.
"Qosymsha 5-6 qańtarda Rixos Water World qonaq úiiniń mańynda ornalasqan qubyrdan belgisiz suiyqtyqtyń aqqanyna qatysty monitoring júrgizildi. Nátijesinde Qarakóldegi las zattardyń shamadan tys kóp ekeni anyqtaldy. Osyǵan qatysty qonaq úige tekserý júrip jatyr, onyń nátijeleri BAQ-ta jariialanady", - dedi Mańǵystaý oblysy ekologiia departamenti basshysynyń mindetin atqarýshy Maǵjan Ǵalymov.
Sarapshylar aqqýlardyń jappai qyrylýyna qus tumaýy sebep degen nusqany ustanyp otyr. Onyń órshýine jol bermeý úshin úi qustary da nazarǵa alynǵan. Kúndelikti monitoring júrgizilip jatyr.
Ortalyq Aziia Ramsar óńirlik bastamasynyń úilestirý komiteti tóraǵasynyń orynbasary Ádilbek Qozybaqov óńir turǵyndaryna qustardy jem bermeý kerektigin aitty.
"Qustarǵa jem berýdiń qajeti joq, óitkeni olardyń tabiǵi jaǵdaida jemi jetkilikti. Qarakólde jyl saiyn kem degende 10-15 myń aqqý qystaidy. Eki kún buryn ornitolog maman 43 myńnan astam aqqýdyń bar ekenin sanap shyqqan. Bul qustarǵa jetkilikti tamaq bar ekenin kórsetedi. Aýstraliiada turatyn qara aqqýdan aiyrmashylyǵy, bizdiń aimaqtarǵa ushatyn aqqý qus tumaýyna óte sezimtal. Ásirese immýniteti qalyptaspaǵan jas qus beiim bolady", - deidi Ádilbek Qozybaqov.
Brifingke qatysýshylardyń aitýynsha, 2023 jyldyń qarasha aiynda Mańǵystaýǵa 7 myńǵa jýyq aqqý ushyp kelgen. Búginde olardyń sany óńirde 43 myńnan asty.
