Mańǵystaý oblysy Qaraqiia aýdanynyń júzge jýyq turǵyny aimaq basshysyna hat joldady. Onda jergilikti turǵyndar tabiǵatty qorǵaý úshin jáne halyqqa jumys ornyn ashyp, tabys tabýyna múmkindik berý úshin Bozjyra mańynda etnoaýyl salýǵa, rettelgen mádeni týrizmdi damytýǵa baǵyttalǵan sharalardy qolǵa alýyn surady, dep habarlaidy "Ult aqparat".
Senek aýylynyń aýmaǵynda ornalasqan Bozjyra shatqalyna týristerdi qabyldaityn sapar ortalyǵy salynady degenge halyq aarsynda túrli pikir boldy.
Aýdan turǵyndarynyń aitýynsha, investorlar kelip, halyqpen kezdesken. Olar aýyldyń áleýmettik-ekonomikalyq damýyna kóptegen múmkindik jasalatynyn aitqan.
«Alaida sońǵy kezderi, ásirese jabaiy týrizmnen mol paida taýyp júrgender men basqa óńirden kelgen «ekologtar» jinalystar men áleýmettik jelilerde orynsyz baibalam salyp, bul úmitimiz úzilýge ainaldy. Olar «tasjol tósep, Bozjyra qasynan (4 km jerden) týristerdi qabyldaityn qonaqúi salyp, (rettelgen, mádeni, ekologiialyq) týrizmdi uiymdastyrý ziian keltiredi» dep halyqty sendirýge tyrysyp, arzan bedel jinap júr. Jabaiy týrizm Bozjyra alqaby men onyń mańyndaǵy jandy jáne jansyz tabiǵatty kúiretip bara jatqany olardyń oiyna kirip-shyǵatyn emes. Memleketke de, elge de, jerge de týrizmdi damytý arqyly paida keltiretin osyndai tabiǵat syiyn basqa jaqtaǵy «janashyrlar» emes, ózimiz qorǵai alamyz. Mańǵystaýdaǵy Qaraman ata, Shopan ata, Shaqpaq ata, Sisem ata siiaqty qasietti jerlerge kúnine ondaǵan adam ziiarat etýge barady, alaida barlyq qozǵalys rettelgendikten olardyń ainalasy tap-taza, ańy da, qusy da ornynda. Sol siiaqty ólkemizdegi búkil musylman álemine belgili, kieli Beket ata jerasty meshitine jumys kúnderi 100-200 adam, al demalys kúnderi 100-150 avtokólikpen bes júzge deiin adam kelip, dál qasyndaǵy qonaqúige túnep, ziiarat etedi. Barlyq qozǵalys rettelgendigi sondai, eshkim esh nársege ziian keltirmeidi. Jan-jaǵy túgel kútimge alynǵan. Sondyqtan da meshit basyndaǵy úirengen arqarlar adamdarmen aralasyp júre beredi. Beket Ata basynda sizder de bolyp, osy aitylǵandarǵa kózderińiz jetken bolar» delingen hatta.
Turǵyndar mádeni týrizm Bozjyradaǵy jaraly tabiǵat pen bezip ketken janýarlar dúniesin dál osylai qalpyna keltiretinine senemiz deidi.
«Al júris-turys rettelmegen, týrister emin-erkin baratyn Airaqty, Aqmysh, Sherqala, Tamshaly, Saýra, Samal sekildi tabiǵat oryndary jyldan-jylǵa azyp bara jatqanyn Mańǵystaý halqy biledi. Sondyqtan ol jerlerde de mádeni týrizmdi uiymdastyrý qajet» delingen hatta.
