Parlament májilisiniń depýtaty Gúljan Qaraǵusova memlekettik baǵdarlamalardyń tiimdiligine kúdikpen qaraitynyn jetkizdi, dep habarlaidy Sputnik Qazaqstan.
Búgin depýtattar 2019 jyldyń naqtylanǵan respýblikalyq biýdjet jobasyn qarady. Sol jerde depýtat Qaraǵusova ataýly áleýmettik kómekti alyp jatqan adamdardyń sanyna qarap, memlekettik baǵdarlamalardyń tiimdiligine kúdik keltirdi. Sebebi ol baǵdarlamalardyń aiasynda jumys oryndary kóptep ashylýy qajet. Al jumys oryndary kóptep ashylǵan saiyn járdemaqy alatyndardyń sany azaiýy tiis.
"Búginde ataýly áleýmettik kómekti alyp otyrǵan adamdardyń sany 1 million 800 myń adamǵa jýyqtady. Táýelsizdik jyldary ishinde ondai bolmaǵan. Bizde jumysqa qabiletti 8 million adam bar. Sonda olardyń ishinde shamamen 2 milliony ataýly áleýmettik kómekti alyp otyr", - dedi Qaraǵusova.
Osy oraida depýtat eńbek jáne halyqty áleýmettik qorǵaý ministri kezindegi jumysyn eske aldy. Onyń aitýynsha, 2007 jyly jaǵdai qiyn boldy, aqsha tapshy, jumys oryndary da az boldy. Soǵan qaramastan, ataýly áleýmettik kómek alatyndardyń sany 1 million 500 myń adamnan 500 myńǵa deiin qysqarǵan bolatyn. Bunyń barlyǵy sol kezdegi jumyspen qamtý salasyndaǵy tiimdi sharalardyń nátijesi deidi depýtat.
"Sonda osy ýaqytqa deiin qolǵa alynǵan aýqymdy jumyspen qamtý baǵdarlamalary neni ózgertti? Biz "Atamekenge" maman daiyndaý, qaita daiarlaý jáne shaǵyn kreditterge qyrýar qarjy berip keldik. Indýstriialyq-innovatsiialyq damý baǵdarlamasynyń ekinshi besjyldyǵy bastaldy. 1 200 kásiporyndy ashtyq. Biz únemi jalaqynyń kólemin kóterip otyramyz. Ne bolyp qaldy? Osynyń bárine kim jaýap beredi?", - dep atap kórsetti Qaraǵusova.
Depýtat jumys toby aiasynda jumyspen qamtý baǵdarlamasyna bólingen barlyq aqshany eseptep, taldaý jasaimyz dep otyr.
