Sybailas jemqorlyqqa qarsy is-qimyl agenttiginiń tóraǵasy Marat Ahmetjanov «Semei ormany» rezervatynyń bas direktory men eki orynbasary ne úshin tergeýge alynǵanyn aitty, dep habarlaidy QazAqparat.
«Semei ormany» rezervatynyń bas direktory men eki orynbasary bastaǵan qylmystyq toptyń qyzmeti toqtatyldy. Olar ormandy sanitarlyq tazartýǵa ruqsat berý arqyly kásipkerlerden para alý shemasyn uiymdastyrǵan. Osylaisha «sanitarlyq tazartý» jeleýimen biregei relikti qaraǵai ormany zańsyz kesilgen», - dedi Marat Ahmetjanov vedomstvonyń alqa májilisinde.
Onyń málimetinshe, atalǵan úsh basshy qamaýǵa alynǵan, qazir ústerinen tergeý júrip jatyr. Sondai-aq, ol Qorǵanys ministrligindegi bylyqtarǵa qysqasha toqtaldy. Aitýynsha, tyl, qarýmen jabdyqtaý jáne qarjylandyrý basqarmalarynyń bastyqtary qol astyndaǵy áskeri qyzmetshilerdiń syiaqysyna ortaqtasyp otyrǵan.
Jartyjyldyqtyń jumysyn qortyndylaǵan alqa májilisinde antikor basshysy vedomstvo qurylymyndaǵy ózgeristerge toqtaldy.
«Prezident Jarlyǵymen agenttiktiń qurylymy ózgerdi. 7 departamenttiń ornyna 3 negizgi qyzmet quryldy. Bul agenttiktiń strategiialyq maqsattaryn tiimdi jáne jáne sapaly oryndaýdy qamtamasyz etedi. Prezident ákimshiligiginiń kelisimen atalǵan qyzmettiń basshylary bolyp Marat Tóleýbaev, Ashat Jumaǵali jáne Dáýren Erǵarin taǵaiyndaldy. Úsheýi de agenttiktiń kadrlary. Sonymen qatar, Agenttik tóraǵasynyń orynbasary retinde Prezidenttiń kadrlyq rezervinen Maqsat Amanqululy Qojabaev taǵaiyndalyp otyr. M.Qojabaev birqatar óńirlerdiń qarjy politsiiasyn, jemqorlyqqa qarsy qyzmetin, prokýratýralaryn basqarǵan. Osyndai zor senimge ie bolyp otyrǵan jańa qyzmetkerler el úmitin aqtap, adal qyzmet etedi dep senemin», - dedi Marat Ahmetjanov.
