Qaraǵandylyq Balnur Túlenovany bir mezgilde AQSh-tyń tórt ýniversiteti oqýǵa shaqyryp otyr. Ol halyqaralyq emtihan tapsyryp, nátijesin álemniń birneshe ýniversitetiniń jalpy bazasyna jibergen, dep habarlaidy "Ult aqparat".
Balnur Túlenova Qaraǵandy qalasynyń Nyǵmet Nurmaqov atyndaǵy daryndy balalarǵa arnalǵan mamandandyrylǵan mektep-internatyn bitirgen.
«Meniń tulǵa retinde qalyptasýym otbasymda bastaldy. Ata-anam maǵan syn-qaterdi qabyldap, qorqynysh jáne kemshiliktermen kúresý úshin qolymnan kelgenniń barlyǵyn jasaý kerek dep tárbieledi. Bala kezimnen bastap anam men ákem maǵan árdaiym básekege daiyn, birinshi kezekte ózimmen kúresýdi, árqashan joǵary deńgeige shyǵýdy úiretti. Al ómirlik jaǵdailar ata-anamnyń maǵan úiretken daǵdylaryn damytýǵa, jeke basymnyń qalyptasýyna jáne kim bolǵym keletinin túsinýge múmkindik bergen serpin boldy», - deidi Balnur.
Boijetken orys, qazaq, frantsýz, aǵylshyn jáne túrik tilderin meńgergen. Ony ekonomika, áleýmettaný jáne jaratylystaný ǵylymdary qyzyqtyrady.
«Sheteldik ýniversitetter bolashaq stýdentterdiń ózindik damýyna, motivatsiiasyna, ishki sipaty men dúnietanymyna úlken mán beredi. Meniń motivatsiialyq hatymdy oqyp, olar tań qaldy. Bes tildi bilýden basqa, men filmmaking and photography-men, sondai-aq ekologiialyq jobalarmen ainalysamyn, matematika boiynsha olimpiadalarǵa qatystym. Ainalysatyn jáne oqityn dáristerimniń tizimi aýqymdy. Ýniversitetter tulǵa retinde qalyptasyp kele jatqan jastardy izdeidi. Boiymda armandarymdy júzege asyrý úshin jetkilikti kúsh, bilim jáne múmkindikter bolsa deimin. Bolashaqta óz biznes-jobalarymdy júzege asyrǵym keledi», - dedi Balnur Túlenova.
10-synypta ol halyqaralyq emtihan tapsyryp, nátijesin ýniversitetterdiń jalpy bazasyna jibergen. Kóp kútpesten oǵan oqýǵa shaqyrý keldi.
Balnur Rod-Ailend shtatynyń ýniversitetine toqtaldy. Bul oqý ordasynda bilim alý quny - jylyna 80 myń AQSh dollaryna deiin. Sátti tapsyrylǵan emtihan qaraǵandylyq túlekke tegin oqýǵa múmkindik beredi.
Bilim alyp, Balnur halyqaralyq kompaniialarda jumys tájiribesin jinaqtaýdy josparlap otyr. Sodan keiin óz isin ashyp, el ekonomikasyn qoldaý úshin Qazaqstanǵa oralmaq.
