Foto: mvc-apatit.ru
Qaraǵandy oblysyndaǵy "Saran" shahtasynyń qyzmetkerleri naqty qansha jalaqy alatynyn aitty, dep habarlady Sputnik Qazaqstan ekaraganda.kz portalyna silteme jasap.
Premer-ministrdiń orynbasary Tamara Dúisenova aitqan 1,6 mln-ǵa jýyq jalaqyny shahterler buryn-sońdy alyp kórmegen.
Bir apta buryn premer-ministrdiń orynbasary Tamara Dúisenova shahtada qaza tapqan kenshilerdiń jalaqysyn jariialady. Onyń sózinshe, kenshiler oryndaǵan biliktiligi men fýnktsionaldyǵyna bailanysty aiyna 300 myńnan 1,6 mln teńgege deiin aqsha alǵan.
"Saran" shahtasynyń qyzmetkerleri Dúisenovanyń deregi shyndyqqa janaspaidy dep málimdedi.
"Taý-ken qazbalaryn ótkizýshiler, taý-ken sheberleri, taý-ken qazbalaryn jóndeý jónindegi jumysshylar – barlyǵy bir aýyzdan eńbekaqynyń shyndyqqa janaspaitynyn rastady. Olardyń sózinshe, ministr aitqan eńbekaqynyń kem degende jartysyn alý úshin eń qaýipti jaǵdailarda jumys isteý kerek jáne eń joǵary razriadtyń sheberi bolý kerek", - delingen basylymda.
"Kúzembaeva", "Lenin", "Qazaqstan" jáne "Saran" shahtalarynyń qyzmetkerleri ózderiniń esep aiyrysý paraqtaryn usyndy. Kenshiler óz atynan da, kásipodaq atynan da sóz sóiledi.
"Eshqashan qazirgidei tómen jalaqy bolǵan emes, 500 myń, 600 myńǵa jetpeidi. Bul - ártúrli tólemderdi shegermegendegi soma. Onyń ózin taý-ken sheberi alady, al qarapaiym jumysshylar she? Premer-ministr qara jumysshylar týraly aittty ǵoi, olar mundai jalaqy almaidy. Ondai aqparatty qaidan aldy?"- dep portal taý-ken sheberi Tilek Ádilmurattyń sózinen úzindi keltirdi.
Al "Saran" shahtasy kásipodaq komitetiniń tóraǵasy Aleksandr Kraýs kenshilerdiń naqty jalaqysy 300-den 800 myń teńgege deiin ekenin aitqan. Biraq shahterler 800 myń teńge jalaqyny berilgen tapsyrysty tolyq oryndaǵanda ǵana alady.
