Qaraǵandylyq oqýshylarǵa gepatit A aýrýy 58-inshi mektepke úiden ákelingen kompottan juqqan. Balalar jemis sýsynyn jańa jyldyń aldynda bi keshinde iship, sodan aýyrǵan bolyp shyqty. Bul týraly búgin óńirge sary aýrýdyń órshýine bailanysty arnaiy jumys saparmen kelgen bas memlekettik sanitarlyq dáriger Jandarbek Bekshin málimdedi, dep habarlaidy "Ult aqparat" "Astana" arnasyna silteme jasap.
"Oqýshylar osy shara kezinde úide daiyndalǵan jemis sýsynyn ishken. Aýrýǵa osy kompot sebep bolǵan. Al ary qarai ol turmystyq qarym-qatynas arqyly juqqan. Densaýlyq saqtaý basqarmasy gepatitti órshitpeý úshin qajetti vaktsinalardy aldy", — deidi Jandarbek Bekshin.
A gepatitin juqtyrǵandardyń sany búgin 43 ten 51-ge jetken. Onyń 34-i oqýshy. Ásirese, qaladaǵy 58-inshi mektepte naýqastar sany kún saiyn artyp jatyr. Jaǵdaidy turaqtandyrý úshin oblysqa 60 myń doza reseilik vaktsina satylyp alynbaqshy.
Jandarbek Bekshinniń aitýynsha, qazir Qaraǵandy oblysynda qoimada osy ekpeniń 7 myń dozasy saqtaýly. Sary aýrýǵa qarsy ekpe naýqastarmen turmystyq qarym-qatynasta bolǵandar men aýrý tirkelgen mektepterdiń 9-10 synyp oqýshylaryna salynady. Ekpe kabinetteri bar bilim oryndarynda arnaiy kezekshi meditsinalyq toptar qurylǵan. Olar vaktsinany óz mektepterinde jasaidy. Bir ǵana 58-shi mektepte 700 balany egý josparlanyp otyr.
