Qaraǵandylyq konkimen júgirýshi Ekaterina Aidova Kalgari qalasynda (Kanada) ótken Álem kýbogynyń IV kezeńinde sátti óner kórsetti. Sportshy úsh olimpiadalyq litsenziianyń iegeri atandy, dep habarlaidy QazAqparat.
Kalgari jarysynda Ekaterina Aidova «V» tobynda 500 m qashyqtyqta birinshi oryn aldy. «A» tobynda 1000 m qashyqtyqta ol toǵyzynshy orynǵa ie boldy, 1500 metrde – 15-shi oryn.
Qaraǵandylyq sportshy 500 jáne 1000 metrge júgirýden Qazaqstannyń jańa rekordyn ornatty.
Álem kýboktarynyń tórt kezeńinde óner kórsetý qorytyndysy boiynsha Ekaterina Aidova 500, 1000, 1500 metr qashyqtyqta Beijińde (Qytai) XXIV qysqy Olimpiada oiyndaryna qatysýǵa úsh litsenziia jeńip aldy. Planetanyń basty jarystary 2022 jyldyń 4-20 aqpan aralyǵynda ótedi.
«Taǵy úsh qaraǵandylyq qysqy Olimpiadaǵa joldama aldy. Konkimen júgirýshi Stanislav Palkin (1000, 1500 m) jáne biatlonshylar Liýdmila Ahatova men Vladislav Kireev olimpiadalyq litsenziialar úshin kúresýde. Liýdmila Ahatova Abertiliha qalasynda ótken biatlonnan Avstriianyń ashyq chempionatynda altyn jáne kúmis medaldardy jeńip aldy. Ol 10 shaqyrymdyq jarysta jeńiske jetip, 7,5 shaqyrymdyq sprintte ekinshi orynǵa ie boldy», - dep habarlady Qaraǵandy oblysynyń dene shynyqtyrý jáne sport basqarmasy baspasóz qyzmeti.
