Foto: kaz.tengrinews.kz
Qaraǵandyda Álihan Bókeihan aýdany ákiminiń orynbasary para aldy degen kúdikpen ustaldy. Ol TKSh máseleleri boiynsha jetekshilik etken, - dep habarlaidy Tengrinews.kz.
Aýdan ákimi orynbasarynyń ustalǵany týraly aqparatty Qaraǵandy oblysy boiynsha sybailas jemqorlyqqa qarsy kúres departamentiniń basshysy Murat Túleýbaev rastady. Ol ákim orynbasarymen qatar ákimdiktegi basqarmalardyń biriniń basshysy da ustalǵanyn atap ótti. Memlekettik qyzmetshiler kásipkerden 500 myń teńge kóleminde para aldy degen kúdikke ilingen.
"Fakt boldy. Men bul derekti rastaimyn. Álihan Bókeihan aýdany ákiminiń orynbasary men bólim basshysy ustaldy. Sońǵysy deldal bolǵan. Olar tikelei óz mindetterine kiretin fýnktsiialardy oryndaǵany úshin kásipkerden 500 myń teńge alǵan. Qazir osyǵan qatysty qylmystyq is tergelip jatyr. Ol áli aiaqtalǵan joq. QR Qylmystyq-protsestik kodeksiniń 201-babyna sáikes sotaldy tergep-tekserý málimetin taratýǵa quqyǵymyz joq", - dedi Murat Túleýbaev.
