Foto: Massaget.kz
Qaraǵandylyqtar Ǵabiden Mustafinge arnap qoiylǵan músinniń qazirgi kúiine shaǵym aitty. Sondai-aq qaladaǵy Jambyl Jabaevtyń músini ornatylǵan alań da jaǵa ustatarlyq kúide eken, - dep habarlaidy Massaget.kz portaly.
Qazaqtyń kórnekti jazýshysy Ǵabiden Mustafinniń músini týǵanyna 100 jyl tolýyna orai qoiylyp, esimimen atalatyn kóshege ornatylǵan. Ol birneshe jyl buryn alańnyń basty sánine ainalǵan edi. Biraq eskertkishtiń qazirgi jaǵdaiy qaraǵandylyqtardy qatty alańdatady.
"Qalanyń ortalyǵynda ornalasqan eskertkishtiń jaǵdaiy óte nashar. Jedel arada jónge keltirmese bolmaidy. Uiat emes pe? Qala turǵyny bolmasam da, eskertkishtiń jai-kúiine beijai qarai almadym. Qala biligi qaida qarap otyr?", - deidi qala qonaǵy Ermek.
Al qala ortalyǵyndaǵy Jambyl kóshesindegi taǵy bir alańda Jambyl Jabaevqa arnap músin ornatylǵan, biraq onyń da jaǵdaiy qazir máz emes kórinedi.
Biyl qysta kommýnaldyq qyzmetter bul alańda ádettegiden kóp tazalyq jumystaryn júrgizdi. Qar qalyń jaýyp, ony kúrektermen jáne tipti shaǵyn kólemdi tehnikamen jinaý qiynǵa soqqanda úlken traktorlar iske qosyldy. Kóktemde bul jumystyń saldarynan jiektastar aitarlyq qiraǵany baiqaldy. Ákimdik tekserý jumystaryn júrgizgennen keiin aýyr tehnikanyń jiektastardyń buzylýyna sebep bolǵanyn málimdedi. Músinniń ózi de retke keltiriledi.
"Keshe atalǵan mekenjaiǵa bizdiń jaýapty mamanymyz baryp, aqaýly akt jasaldy. Jóndeý, qalypqa keltirý jumystary baǵdarlamasy aiasynda barlyq qajetti sharalar júrgiziledi. Kemshilikterdi joiyp, eskilerin jańasyna aýystyramyz. Jambyl Jabaev eskertkishiniń aldyńǵy bóligin boiaý jumystary jasalady. Jalpy, aýmaq abattandyrylady. Jumystar mamyr-maýsym ailaryna josparlanǵnan", - deidi Qazybek bi atyndaǵy aýdan ákimdiginiń josparlaý jáne abattandyrý bóliminiń basshysy Nariman Itkarin.
Ǵabiden Mustafinniń músinin jóndeý tender aiaqtalyp, merdiger anyqtalǵan soń bastalmaq. Al alańnyń ózine biyl kúrdeli jańartý jumystary josparlanbaǵan.
