Qaraǵandydaǵy "Siti Moll" saýda úiinde belgisiz bireý teýip jibergennen keiin eskalatordan jerge qulaǵan 25 jastaǵy jigit oqiǵa qalai bolǵanyn aityp berdi, - dep habarlaidy Tengrinews.kz saity ekaraganda.kz saityna silteme jasap.
11 sáýirde zardap shekken 25 jastaǵy jigit City Mall saýda ortalyǵyna shashtarazǵa kelgen. Onyń aldynda dárethanaǵa kirgen. Sol jerde eki er adam (zardap shekken jigitti teýip jibergen er adam men basqa adam) sózge kelispei qalǵan. Daýdyń arty tóbeleske ulasqan.
Zardap shekken jigit olardyń janjaly aralasqysy kelmegen. Alaida ol dárethanadan shyqqannan keiin janjaldasqan er adamnyń biri onyń artynan ańdi bastaǵanyn baiqaǵan.
"Er adam artymnan birge shyqty. Adidas-tyń janynda toqtadym. Ol maǵan shap berip, tóbelesip qaldyq. Aiaǵynan shalyp, jerge qulattym. Sosyn ol meni bireýmen shatastyryp alǵanyn aitty. Men ony jiberip, ekeýimiz eki jaqqa kettik. Sóitip eskalatormen túsip bara jatqanmyn. Álgi jigit artymnan kelip, meni teýip jiberdi. Qaita lezde áreket etip, eskalatordan túsken boida ǵana qulap tústim", - deidi zardap shekken jigit.
Osylaisha ol esinen tanyp qalǵan. Eskalatorda lezde oilanyp úlgergeniniń arqasynda ǵana aýyr jaraqat almaǵan. Zardap shekken jigit basyn qatty uryp alǵan. Miy shaiqalmaǵan, biraq erni jyrtylyp, tisine zaqym kelgen.
"Ernim áli jazylyp úlgermedi. Tómengi jaǵym kishkene aýyryp, tisim synǵan. Tis dárigerine barýǵa týra keledi. Biikten ushyp qulap, kafelge túskendikten denem kógerip qalǵan. Basynda árine qatty tańǵaldym. Biraq qazir bári durys. Ol er adam ustaldy. Tergeý júrip jatyr eken. Aryz jazdym, ary qarai zań sheshedi. Politsiiadaǵylar maǵan ol er adam 2009 jyldan beri psihonevrologiialyq dispanserde tirkelgenin aitty. Men aman-saýmyn, jazylyp kele jatyrmyn. Ol adamdy jeke tanymaimyn, eshqashan kórgen emespin", - deidi zardap shekken jigit.
Eske salaiyq, jaǵaustatar video Instagram-daǵy karaganda.city paraqshasynda paida boldy. Politseiler kúdiktini qolǵa túsirdi.
Zardap shekken 25 jastaǵy Qaraǵandy turǵynyna dene jaraqattaryn keltirý deregine bailanysty QR QK 293-baby 1-tarmaǵyna sáikes qylmystyq is tirkeldi.
Politsiia qyzmetkerleri buryn psihiatorlyq esepte turǵan 31 jastaǵy azamatty ustady. Ol oblystyq psihonevrologiialyq dispanserine ornalastyrylǵan.
