Qaraǵandy oblysynda ereýildetip, bir táýlikten beri jer astynan shyqpai otyrǵan 600-den astam kenshimen kelissózder júrgizilip jatyr, dep habarlady QR Eńbek jáne áleýmettik qorǵaý ministri Tamara Dúisenova.
"Qaraǵandy oblysy ákimdiginiń bizge bergen málimetine sáikes, jerdiń astyndaǵy shahterlerdiń sany 684. Segiz shahtanyń árqaisysy óz ókilderin jiberdi. 32 belsendi jumys berýshimen kezdesip, kelissóz júrgizip jatyr. Búgin saǵat toǵyzda jumys berýshi men jumyskerler arasynda kelissózder bastaldy. Qaraǵandy oblysy ákimshiligi, bizdiń eńbek inspektsiiamyz, basqa da quqyq qorǵaý organdarynyń bári sonda. Qajetti monitoring jasalyp jatyr. Jumys berýshi men jumyskerler arasyndaǵy kelissózder aiaqtalǵannan keiin qandai kelisimge kelgeni jóninde qosymsha aqparat beretin bolamyz", — dep habarlady Dúisenova jýrnalisterge úkimet otyrysynan keiin.
Ministrdiń aitýynsha, kenshilerdiń negizgi talaby — eńbekaqyny júz paiyzǵa deiin kóterý.
"Qazirgi ýaqytta "ArselorMittaldyń" shahtalarynda istep jatqan azamattar alatyn eńbekaqynyń eń tómengi mólsheri — 208 myń teńge, al joǵary mólsheri — 326 myń teńge. Budan bólek, olar eńbekke jaramsyzdyq paraǵyn júz paiyz tóleý máselesin talap etip otyr. Sonymen qatar eńbekaqyǵa bailanysty tarifter jónindegi máseleler bar. Zeinet jasyn 50-deiin tómendetý, shahterlerdiń saýyqtyrý keshenin qaitarý máseleleri qarastyrylyp jatyr", — dedi ministr.
