© Photo: Dinara Zákievanyń áleýmettik jelidegi paraqshasynan
Qazaqstannyń bala quqyqtary jónindegi ýákili Dinara Zakieva balalar jappai ýlanǵan Qaraǵandyǵa baryp, oqiǵanyń mán-jaiyn tolyǵyraq aityp berdi, dep habarlaidy "Ult aqparat".
"Ókinishke qarai, bir bala qaitys boldy. Onyń ata-anasyna qaiǵyra kóńil aitamyn. Alty bala aýyr hálde jansaqtaý bóliminde, jeti bala aýrýhanada jatyr (taǵy 2 bala tústi). Olardyń arasynda jetim balalar da bar.
Qazirgi tańda bul oqiǵaǵa bailanysty qylmystyq is qozǵalyp, komissiia quryldy. Ýlaný sebepterin anyqtaý boiynsha jumys júrgizilip jatyr.
Balalarǵa meditsinalyq-áleýmettik qyzmetter kórsetetin 84 mekemeniń barlyǵynda Bas prokýratýra keshendi tekseris júrgizetin bolady. Onyń 20-synda jetim balalar men ata-anasynyń qamqorlyǵynsyz qalǵan balalar turady" - dep jazdy ýákil Facebook paraqshasynda.
Sondai-aq ol kúzde óńirlerge is saparlar aiasynda barlyq balalar mekemesin tekserýdi josparlap otyrǵanyn aitty.
"Jalpy, qazir biz bul salada memlekettik organdarmen birge balalalarǵa arnalǵan mekemelerdegi kameralardy tikelei TsOÝ men jaýapty organdarǵa qosý boiynsha jumys istep jatyrmyz.
Sonymen qatar jumys júrgizý kerek taǵy biraz másele bar, solardyń ishinde:
1. Mamandardy daiarlaý sapasyn, olardyń deńgeiin nazarǵa alý kerek. Sondai-aq olardyń jalaqysyn arttyrýdy da qarastyrý qajet.
2. Balalardyń tamaqtaný normativterin qaita qaraý jáne talaptardy qatańdatý qajet. Bul másele boiynsha beiindi ministrlikpen jumys isteitin bolamyz" - dep túiindedi ol.
Eske sala keteiik, Qaraǵandyda balalarǵa arnaýly áleýmettik qyzmet kórsetý ortalyǵynda balalar jappai ýlanyp, 1 bala qaitys bolǵan edi. Alty bala jansaqtaý bóliminde jatyr. Qaraǵandy oblysyndaǵy tragediiadan keiin prokýratýra tergeýdi bastady. Al bas sanitardyń aitýynsha, 12 balaǵa da "túsiniksiz genezden ýlaný" diagnozy qoiylǵan. Qazirgi kezde ýlanýdyń sebebi anyqtalyp jatyr.
