Qaraǵandyda transformatorlyq qosalqy stantsiia tolyǵymen órtenip ketti. Oqiǵa saldarynan úsh kósheniń úileri elektr jaryǵynsyz qaldy, dep habarlaidy QazAqparat.
Transformatorlyq qosalqy stantsiiadaǵy órttiń saldarynan Qaraǵandynyń segiz kópqabatty úii jaryqsyz qaldy. Bul Kostenko, Abai jáne Jambyl kóshelerindegi úiler.
«26 qyrkúiek kúni saǵat 17:44 órt týraly habar kelip tústi. Qaraǵandy qalasynyń Buqar Jyraý dańǵyly, №12 úidiń mańynda 20 metr elektr symdary janyp, jalyn transformatorlyq qosalqy stantsiianyń janǵysh bólikteri, elektr sanaýyshtary jáne aǵash konstrýktsiialaryn sharpyp, jalpy alańy 40 sharshy metr aýmaqty aldy. Órt 18:44 sóndirildi. Qaza bolǵandar men zardap shekkender joq. Aldyn ala boljam boiynsha órttiń sebebi elektr symdarynyń qysqa tuiyqtalýy boldy», - dep habarlady Qaraǵandy oblysy TJD baspasóz qyzmeti.
Búgin qala ákimi Ermaǵanbet Bólekpaev óziniń Facebook paraqshasynda kún sońyna deiin úilerdi elektrmen jabdyqtaý qalpyna keltiriletinin habarlady.
«Qazirgi ýaqytta bólshekteý júrgizilýde, sodan keiin olar 2 transformatordy ornatýdy bastaidy. Búgingi kúni Kostenko kóshesi 1,3, Abai kóshesi 2,4,6, Jambyl kóshesi 1,3,5 úilerin elektrmen jabdyqtaý qalpyna keltiriledi», - dep jazady Qaraǵandy qalasynyń ákimi.
