Qaraǵandyda temirjol ótkelinde teplovoz men KamAZ soqtyǵysty. Oqys oqiǵa videoǵa túsip qaldy, - dep habarlaidy Tengrinews.kz tilshisi.
Oqiǵa Bytovaia kóshesinde saǵat 17:22 shamasynda bolǵan. Beinetirkegishten túsirilgen kadrlar áleýmettik jelide tarap ketti. Olar ótkel boiymen qozǵalyp kele jatqan teplovozdy jáne júrgizýshisi jyldamdyǵyn báseńdetýge úlgermegen, jaqyndap kele jatqan poiyzdyń aldyndaǵy ótkelden tez syrǵyp ótpek bolǵan júk kóligin kórsetedi.
Qaraǵandy oblysy PD baspasóz qyzmeti oqiǵaǵa qatysty túsinikteme berdi. Vedomstvo atalǵan fakt tirkelgenin atap ótti.
"32 jastaǵy KamAZ júrgizýshisi Buhar-Jyraý dańǵylynan Asfaltnaia kóshesine qarai Bytovaia kóshesimen kele jatqan. Temirjol ótkelinde ol teplovozben soqtyǵysýǵa jol berdi. JKO nátijesinde kólik quraldary mehanikalyq zaqym aldy. KamAZ júrgizýshisi meditsinalyq kómekke júgingen joq", - dep habarlady vedomstvodan.
Sondai-aq, politsiia atalǵan ýchaskede kóktaiǵaq bolmaǵanyn, baǵdarsham durys jumys istegenin, jol belgileri de bar ekenin atap ótti.
"Atalǵan fakt boiynsha saraptama taǵaiyndaldy. Olardyń nátijeleri boiynsha protsessýaldyq sheshim qabyldanatyn bolady", - dep tolyqtyrdy vedomstvo.
