Qaraǵandydaǵy aýrýhanalardyń birinde naýqas jigit dárigerge shabýyl jasaǵan sáti beinekameraǵa túsip qalǵan. Politseiler janjalǵa ne sebep bolǵanyn anyqtap jatyr, dep habarlaidy QazAqparat.
Áleýmettik jelilerde beinebaqylaý kamerasynan alynǵan video tarap ketti. Onda naýqastyń dárigerdi jaǵynan urǵany túsirilgen. Janjal Qaraǵandy qalasynyń H.J. Maqajanov atyndaǵy travmatologiia jáne ortopediia oblystyq ortalyǵynda bolǵan. Videoda er adam dárigerdi iyǵynan qushaqtaidy. Ol óz kezeginde jigittiń qolyn alyp tastaidy. Alaida naýqas bul áreketke ashýlanyp, dárigerdiń betinen ura bastaidy.
Politsiia dárigerge shabýyl jasaý faktisi boiynsha qylmystyq is qozǵady.
«Atalmysh fakt tirkeldi. Sot-meditsinalyq saraptama taǵaiyndaldy. Tergeý júrip jatyr», - dep habarlady Qaraǵandy oblysy PD baspasóz qyzmeti.
Sonymen qatar bul jaǵdaiǵa qatysty densaýlyq saqtaý basqarmasy da málimdeme jasady.
«16 sáýirde professor H.J. Maqajanov atyndaǵy aýrýhananyń jaraqat pýnktine 1986 jyly týǵan er adam oń jaq qol aýmaǵyndaǵy ortasha aýyrsyný men isinýge shaǵymdanǵan. Naýqastyń aitýynsha, ol saýsaǵyn qulap, jaraqattap alǵan. Tekserý nátijesinde «oń qolynyń jabyq synyǵy» diagnozy qoiylyp, bekitetin tańǵysh salynǵan. Osydan keiin patsient súiektiń qaita jyljýyna jol bermeý maqsatynda jedel emdeýge jiberildi. Alaida naýqas gips qoiýdan úzildi-kesildi bas tartty. Ol dóreki minez tanytyp, kezekshi travmatologqa dene jaraqatyn saldy», - dep habarlady vedomstvodan.
Zardap shekken dáriger quqyq buzýshyny keshirmeitinin aityp, zańǵa sai jazalanýyn talap etpekshi.
