Foto: elements.envato.com
Qaraǵandy turǵyny internattardyń biriniń direktory onyń qyzyn zorlady dep aiyptap otyr. Bul fakt boiynsha tergeý júrip jatyr, - dep habarlaidy Tengrinews.kz saity.
Ata-anasynyń aitýynsha, qyzy biyl 9-synypty bitiredi. Pán muǵalimi bolǵan direktor emtihanǵa daiyndalý úshin oǵan qosymsha sabaq ótkizgen. Kezekti qosymsha sabaq kezinde muǵalim oqýshy qyzdyń qolynan ustap, kámeletke tolmaǵan jasóspirimdi jynystyq qatynasqa itermelegen.
"6 maýsymda qyzym maǵan telefon soǵyp, mektep direktory tiiskenin aitty. Men birden mektepke bardym, sol jerde direktormen kezdestim. Qyzym maǵan direktor keýdesinen ustaǵanyn, moinyn súimek bolǵanyn, ony qalai alyp ketkenin egjei-tegjeili aityp berdi. Munyń bári onyń kabinetinde bolǵan. Sol ýaqytta ol esikti ishten qulyptap, qyzdy jibermei qoiǵan. Hatshy bul kezde mektepte joq edi. Qyzym onyń qolynan áreń qutylyp ketken. Sol kezde ol qyzdan bárin umytýyn surap jáne eshkimge aitpaýyn ótingen. Osynyń bárin qyzym onyń kózinshe aitqanda ol úndemei qaldy. Tipti ózin aqtaýǵa nemese qarsylyq bildirýge tyryspady. Men politsiia shaqyrdym", - dedi mektep oqýshysynyń anasy.
Qyzdyń anasynyń sózinshe, politseiler QR Qylmystyq kodeksi 123-babynyń 2-bóligi boiynsha "Kámeletke tolmaǵandarǵa jynystyq qatynasqa májbúrleý" boiynsha aryz tirkegen. Ol advokat jaldap, direktordy qyzmetinen ketirgisi keledi.
"Bizge ony da, bizdi de poligrafologiialyq tekseristen ótkizýi múmkin ekenin aitty. Biz ótirik detektorynan ótýge daiynbyz. Men qyzyma senemin. Ony eń bolmaǵanda direktorlyq qyzmetten shettetýdi qalaimyz. Qazir bizge qysym kórsetilip jatyr. Attestat berýden bas tarty. Barlyq ata-ana ashýlanyp, keibireýleri meni buǵattap tastaǵan. Men balamdy qorǵap júrmin. Meniń qyzyma tiiskendei basqalarǵa da ziiany timegenin qalaimyn. Biz onyń osy ýaqytqa deiin jumys istegen jyldarynda mundai jaǵdaiǵa ushyraǵan alǵashqy jan emespiz dep oilaimyn. Onyń qurbany bolǵan basqa qyzdar bar ekeni sózsiz. Bálkim, olar bir kezderi aitýǵa qorqyp, uialǵan shyǵar. Eger olar bar bolsa, men olardy tapqym keledi. Óitkeni, bul - úlken adam, ol qazirdiń ózinde alpysta, biraq ózin osylai ustaidy. Mundai adamdarǵa balany senip tapsyrýǵa bolmaidy", - dedi qaraǵandylyq áiel.
Mektep direktory telefon arqyly sóilesken kezde túsinikteme berýden bas tartty. Tergeý shyndyqty kórsetedi dedi.
Oblystyq politsiia departamenti qaraǵandylyq qyzdyń aryzy boiynsha tergeý júrip jatqanyn rastady.
"Is politsiiaǵa tirkeldi. Qazirgi ýaqytta qajetti jedel-izdestirý sharalary júrgizilip jatyr. Basqa málimetterdi taratýǵa bolmaidy", - dep habarlady Qaraǵandy oblysy IID baspasóz qyzmeti.
Eske sala keteiik, osyǵan deiin Almaty oblysyndaǵy aýyldardyń birinde 14 jastaǵy oqýshy qyz 53 jastaǵy dene shynyqtyrý páni muǵaliminiń ústinen shaǵymdanǵan. Oqýshy qyzdyń aitýynsha, muǵalim jumys bólmesine kirgizip, oǵan jaqyndap, tiispek bolǵan. Alaida politsiiaǵa bergen aryzdan keiin er adam ustalǵan joq, onyń ornyna tergeýshiler qyzdan túngi úshke deiin jaýap alǵan. Almaty oblysynyń bilim basqarmasy istiń tergelip jatqanyn habarlady. Oqýshyǵa psihologiialyq kómek kórsetilmek.
