Foto: Polisia.kz
Qaraǵandynyń qorǵanshylyq jáne qamqorshylyq bólimi kósheden tabylǵan sábi anasyna qaitarylýy múmkin ekenin habarlady, - dep habarlaidy Tengrinews.kz tilshisi "Patriot" Telegram-arnasyna silteme jasap.
Vedomstvo málimetinshe, qazir tergeý amaldary júrgizilip, náresteniń 22 jastaǵy anasynyń psihikalyq jaǵdaiyn anyqtaý maqsatynda saraptama júrgizilip jatyr.
"Eger ol ózin ustai almaityn jaǵdaida bolǵany nemese kúshti preparattan esengiregeni nemese baladan qutylý úshin oǵan qandai da bir qysym jasalǵany anyqtalsa, onda bala oǵan qaitarylýy múmkin. Nemese ata-ana quqyǵy shektelýi múmkin. Ázirge onyń áreketine quqyqtyq baǵa berilgen joq. Sábidi ádeii tastap ketip, balany kórgisi, baqysy kelmese, oǵan sábi berilmeidi. Ol náreste úiine beriledi. Al eseigen soń balalar úiine aýystyrylady", - dep habarlady Qaraǵandy "Bilim bólimi" qorǵanshylyq jáne qamqorshylyq bólimi.
Sonymen qatar, vedomstvo teoriialyq turǵydan basqalar náresteni asyrap ala alatynyn atap ótti.
"Balanyń jaǵdaiy áli anyqtalǵan joq. Eger "jetim" nemese "bas tartylyp" mártebesi anyqtalsa, bala asyrap alýǵa beriledi. Ázirge asyrap alýǵa úmitkerlerdi qarastyra almaimyz. Barlyǵy zańǵa sáikes bolýy kerek", - dep jazdy "Patriot".
Bala qazir balalar aýrýhanasynda tekserilip jatyr. Sonymen qatar, 22 jastaǵy áiel men 29 jastaǵy er adamǵa qatysty "balany qaýipti jaǵdaida qaldyrý" baby boiynsha qylmystyq is tergelýip jatyr.
Eske salaiyq, 24 aqpanda keshki saǵat 10-da Qaraǵandyda kópqabatty úidiń kireberisi mańynda er adam jerde jatqan balany taýyp alǵan. Politsiia 28 aqpanda sábidiń 22 jastaǵy anasy men onyń 29 jastaǵy ákesiniń ustalǵanyn habarlady.
