Qaraǵandyda kópqabatty turǵyn úidiń bir kireberisi karantinge jabyldy. Ondaǵy páterlerge kúnine eki ret azyq-túlik jetkiziledi, dep habarlaidy QazAqparat.
Qaraǵandyda Ermekov kóshesindegi № 106/1 úidiń kireberisine 14 kúndik karantin engizildi. Turǵyndarǵa dalaǵa shyǵýǵa shekteý qoiyldy. Olar turaqty meditsinalyq baqylaýda bolady. Azyq-túlik pen birinshi qajettiliktegi taýarlardy turaqty jetkizý, sonymen qatar qoqys shyǵarý uiymdastyryldy.
«Turǵyndar arasynda COVID-2019 kúdigimen bir oqiǵa tirkelýine bailanysty Qaraǵandy qalasyndaǵy Ermekov kóshesi, 106/1 mekenjaiy boiynsha úidiń kireberisine karantin engizildi. Páterler men kireberiske dezinfektsiia júrgizildi. Politsiia kúzet ornatty. Dárigerler turǵyndardyń densaýlyǵyn únemi qadaǵalap otyrady», - dep habarlady Qaraǵandy oblysynyń Taýarlar men kórsetiletin qyzmetterdiń sapasy men qaýipsizdigin baqylaý departamentinen.
Turǵyndar karantin talabyn buzbaýy úshin kireberis ýaqytsha buǵattalǵan. Politsiia qyzmetkerleri men meditsina mamandary únemi kezekshilik etedi.
«Kireberistiń ishinde qaldyqtardy jinaýǵa arnalǵan plastik konteiner qaqpaqpen jabylǵan. Qoqys kúnine eki ret shyǵarylady. Azyq-túlik saǵat 10.00-de jáne 17.00 «Aian« sýpermarketinen ótinim boiynsha jetkiziledi. Kýrermen tikelei bailanys bolmaidy, tapsyrystardy politsiia qyzmetkerleri beredi», - dep túsindirdi qala ákimdigi.
14 kúndik karantin aiaqtalǵannan keiin turǵyndar qalypty kúndelikti rejimge orala alady.
