Qaraǵandyda matematik ǵalym Álimhan Ermekov turǵan úide memorialdyq taqta ashyldy, dep habarlaidy "Ult aqparat".
Qaraǵandyda qazaqtyń tuńǵysh matematik-professory, Qazaq halqynyń táýelsizdigi úshin kúresker Álimhan Ermekovtyń esimi máńgi este qaldy. Kórnekti ǵalym jáne qoǵam qairatkeri turǵan Abai kóshesindegi (burynǵy Lenin) №58 úige memorialdyq taqta ornatyldy.
«Rýhani jańǵyrý» baǵdarlamasynyń «Týǵan jer» arnaiy jobasy aiasynda Qaraǵandy tehnikalyq ýniversiteti sharaǵa bastamashy boldy. Álimhan Ermekov 1950 jyldary osy joǵary oqý ornynda joǵary matematika kafedrasynda jumys istegen.
Memorialdyq taqtanyń ashylý saltanatyna Qaraǵandy qalasynyń ákimi Ermaǵanbet Bólekpaev, Qaraǵandy tehnikalyq ýniversitetiniń rektory Marat Ibatov, ǵalymdar men qoǵam qairatkerleri qatysty. Sharaǵa Maryadi education bilim berý kompaniiasynyń basshysy, ǵalymnyń nemeresi Oleg Ermekov qatysty.
Eske alý mitingine qatysýshylar Álimhan Ermekovtyń qazaq memlekettiligin qurýǵa qosqan eleýli úlesi týraly aitty.
Nemeresi barlyq týystarynyń atynan ǵalymdy este este saqtaǵany úshin alǵys aitty.
«Men tolqyp turmyn. Atam týraly estelikti saqtaýǵa jáne ony jańa urpaqqa qaldyrý úshin eńbek etip jatqan azamattardyń barlyǵyna rizamyn. Árine, bul mańyzdy oqiǵa. Uly tulǵalar týraly estelik bolashaqta durys áreketter jasaý jáne uly adamdardyń energiiasynan qýat alý úshin qajet. Álimhan Ermekov pen onyń serikteri patriotizmniń úzdik úlgisi bolyp tabylady. Búgingi jastar olardan úlgi alýy kerek. Bul elimizdiń tutastyǵyn, memlekettiligin saqtaý jáne búgingi kúrdeli álemde durys sheshim qabyldaý úshin qajet», - dedi Oleg Ermekov.
Kelesi jyly Álimhan Ermekovtyń týǵanyna 130 jyl tolady. Qaraǵandy tehnikalyq ýniversitetiniń rektory Marat Ibatov mereitoilyq josparlary týraly habarlady. Ýniversitet ataýly aýditoriia ashyp, halyqaralyq ǵylymi konferentsiia men matematikalyq olimpiada ótkizýge nietti. Qaraǵandylyqtar Tomsk politehnikalyq ýniversitetinde kórnekti qazaq ǵalymy oqyǵanyn eske alý úshin taqta ornatqysy keledi.
Álimhan Ermekov (1891-1970) Semei oblysynyń Qarqaraly ýezinde (qazirgi Qaraǵandy oblysynyń Aqtoǵai aýdany) dúniege kelgen. Qazaq qoǵam qairatkeri, «Alash» partiiasynyń negizin qalaýshylardyń biri, qazaqtyń tuńǵysh professor-matematigi.
1912-1917 jyldary Tomsk tehnologiialyq institýtynda (qazirgi Tomsk politehnikalyq ýniversiteti) oqydy. 1923 jyly taý-ken injeneri diplomyn jáne geolog-barlaýshy mamandyǵyn aldy.
1920 jyly Qazaq KSR Ortalyq Atqarý komitetiniń múshesi Álimhan Ermekov Máskeýde V. Leninniń tóraǵalyǵymen ótken otyrysta Qazaqstannyń jaǵdaiy týraly baiandama jasady. Nátijesinde Kaspii jaǵalaýy, Aqmola jáne Semei oblystary siiaqty birqatar aýmaqtardy Qazaqstanǵa qaitarýǵa qol jetkizildi.
1938 jyly kontrrevoliýtsiialyq árekette jalǵan aiyppen tutqyndalady. 18 jyl boiy tergeý men qamaýda boldy. 1955 jyly merziminen buryn bosatylyp, 1955-1957 jyldary resmi túrde aqtaldy.
Álimhan Ermekov - 1935 jyly qazaq tilinde jaryq kórgen «Uly matematika kýrsy» oqýlyǵynyń avtory. Ol «Qazaq tilindegi matematikalyq terminder» sózdik-anyqtamalyǵyn ázirledi.
1924 jyldan 1958 jylǵa deiin Qazaqstannyń joǵary oqý oryndarynda jumys istedi.
