Foto: Polisia.kz
Qaraǵandylyq “Kiberpol” qyzmetkerleri “Hi-Tech” jedel aldyn alý is-sharasynyń aiasynda 30-dan astam alaiaqtyq faktisine qatysy bar kúdiktilerdi ustaý operatsiiasyn júrgizdi, – dep habarlaidy Polisia.kz.
Jábirlenýshilerge keltirilgen shyǵyn kólemi – 15 mln teńge. Jábirlenýshiler tek Qaraǵandy oblysynyń ǵana emes, elimizdiń basqa da óńirlerinen ekeni belgili boldy.
Kúdiktilerdi ustaý operatsiiasyna politsiia qyzmetkerlerimen qosa, balalardy qorǵaý uiymynan da ókilder qatysqan. Óitkeni kúdiktilerdiń biri kámelet jasqa tolmaǵan.
"Olardy ustaý operatsiiasy Almaty jáne Taldyqorǵan qalalarynda júrgizildi.
17 jastaǵy jasóspirim men onyń seriktesi - Almaty qalasynyń 54 jastaǵy turǵyny áleýmettik jeli arqyly arzan baǵaǵa telefon satamyz dep habarlama jariialaǵan. Olardy ustaý barysynda kúdiktilerden Apple 256Gb markaly Makbýk, tapsyrys berýshilerdi jazǵany týraly qoiyn kitapsha, Beeline, Activ, Tele2 operatorlarynyń bes SIM-kartasy, 5 million 453 myń teńge aqsha, Instagram áleýmettik jelisine bailanystyrylǵan IPhone 14 telefony tárkilenip, alyndy" - delingen habarlamada.
Qazirgi ýaqytta atalǵan derek boiynsha tiisti tergeý áreketteri júrgizilýde. Ustalǵandardyń basqada osyǵan uqsas qylmysqa qatysy bar-joǵy anyqtalyp jatyr.
