Qaraǵandy oblysynyń ákimi Jeńis Qasymbek óńirdegi epidemiologiialyq ahýal jaily Úkimetke esep berdi, dep habarlaidy QazAqparat.
«Naýqastaný kórsetkishiniń deńgeii - 2 paiyzdan tómen. Sońǵy eki aptadaǵy taldaý jalpy epidemiologiialyq jaǵdaidyń turaqtanǵanyn kórsetip otyr. Qazirgi ýaqytta patsientterdiń kúndelikti shyǵarylýy aýrýhanaǵa jatqyzý kórsetkishinen joǵary. Aýrýhanalardaǵy oryn júktemesi 50 paiyzǵa deiin tómendedi. Mysaly eki apta buryn bul kórsetkish - 80 paiyz bolǵan edi. Jedel járdem shaqyrý jaǵdaiy sońǵy aptada úsh ese tómendedi», - dedi Jeńis Qasymbek Úkimet otyrysynda.
Qaraǵandy oblysy ákiminiń aitýynsha, kúz jáne qys mezgiline jan-jaqty daiyndyq júrgizilip jatyr. Aýrýhanalardaǵy oryn sany 4486-ǵa deiin jetkizildi. Aýrýhanalardy zamanaýi meditsinalyq qurylǵylarmen jaraqtaý jalǵasýda.
«Pandemiianyń alǵashqy ailarynda qolda bar 42 ókpeni jasandy jeldetý apparatyna qosymsha 120 apparat, 160 ottegi kontsentratory satyp alyndy. Qazirgi tańda taǵy 90 ókpeni jasandy jeldetý apparaty alynyp jatyr. Onyń ony osy aptada jetkiziledi. Naýqastardy ottegimen qamtamasyz etý úshin 1500 kontsentrator satyp alyndy», - dedi ol.
