Foto: gov.kz
Balalardyń ýlaný oqiǵasynan keiin Qaraǵandy oblysynyń arnaýly áleýmettik qyzmet kórsetý ortalyǵynyń 10 qyzmetkeri qaitadan óz jumysyna kiristi. Bul týraly Densaýlyq saqtaý vitse-ministri – Bas memlekettik sanitariialyq dáriger Aijan Esmaǵambetova aitty, dep habarlaidy QazAqparat agenttigi.
«Osy fakti boiynsha komissiia qurylyp, ony oblys ákiminiń áleýmettik máselelerge jetekshilik etetin orynbasary basqarady.
Sol kezde bul meditsinalyq-áleýmettik mekemede bala ólimi tirkelgen edi. Sodan keiin komissiia meditsina qyzmetkerlerin belgili bir merzimge jumystan shettetý týraly sheshim qabyldady», - dedi Esmaǵambetova Ortalyq kommýnikatsiialar qyzmetindegi baspasóz máslihatynda.
Vitse-ministrdiń aitýynsha, keshe komissiianyń sheshimimen atalǵan meditsinalyq-áleýmettik mekemedegi 10 meditsina qyzmetkeri óziniń jumysyna qaita kiristi. Qalǵan eki meditsina qyzmetkeri, iaǵni bólim meńgerýshisi men psihiatr dáriger jumystan shettetilgen.
Eske salsaq, 30 shildede Qaraǵandy oblysynyń Balalarǵa arnaýly áleýmettik qyzmet kórsetý ortalyǵynda birneshe bala ýlanyp, olardyń bireýi qaza taýyp, altaýy jansaqtaý bólimine jetkizildi.
Tamyz aiynyń basynda Sotqa deiingi tergeý aiaqtalǵanǵa deiin tekserý kezinde ortalyq direktorynyń mindetin atqarýshy jáne osy ortalyqtyń 12 meditsina qyzmetkeri jumystan jáne óz mindetterin oryndaýdan shettetilgen edi.
