Qaraǵandyda aialdama pavilondary dezinfektsiialanady. Jumysshylar sondai-aq otyratyn oryndardy tazalaidy jáne irgeles aýmaqty zararsyzdandyrady, dep habarlaidy "Ult aqparat".
«Búginnen bastap joldardy, saiabaqtardy jáne gúlzarlardy kútip ustaý boiynsha qyzmet kórsetetin barlyq merdigerlik uiymdar aialdamalardy, oryndyqtardy, tirek qorshaýlaryn, ýrnalardy, baǵdarsham nysandaryn, baǵdarshamdardy shaqyrý tablosyn arnaiy qospamen óńdeýdi bastady. Sondai-aq kúnine bir ret balalar men sport alańdaryna dezinfektsiia júrgiziledi», - deidi Qaraǵandy qalasynyń kommýnaldyq sharýashylyq bólimi basshysynyń orynbasary Rústem Qojaqpanov.
Jumysty tórt merdiger uiym oryndaidy. Aýdandyq ákimdikter men kommýnaldyq sharýashylyq bólimi tarapynan kúndelikti baqylaý júrgiziledi.
Qalada kún saiyn 400-den astam aialdama pavilony, 2000 oryndyq, jaiaý júrginshiler shaqyrý qurylǵylarynda 92 shaqyrý tablosy óńdeledi.
«Qaraǵandy Sý» JShS aýyz sý sapasyn baqylaý zerthanasy bastyǵynyń mindetin atqarýshy Elena Gnilomiodova dezinfektsiiany qandai eritindimen júrgizetinin aitty.
«Kún saiyn «Qaraǵandy Sý» JShS zerthanasy 400 tekshe metr kóleminde kontsentratsiiasy 0,1% kaltsii gipohloridi negizinde hlorly dezinfektant daiyndaidy. Bul dezinfektant zararsyzdandyratyn qasietterge ie», - dep túsindirdi maman.
