Kollaj: Ulysmedia
Májilis depýtattary Qaraǵandy oblysyndaǵy Kostenko atyndaǵy shahtada bolǵan apatqa bailanysty málimdeme jasady, dep habarlaidy Sputnik Qazaqstan.
"Kostenko" shahtasyndaǵy qaiǵyly oqiǵa búkil Qazaqstan halqyn dúr silkindirdi. Biz Qazaqstan Parlamenti Májilisiniń atynan árbir otbasyna shyn júrekten qaiǵyryp kóńil aitamyz", - dep bastady depýtattyq saýaldy májilismen Arman Qalyqov.
Onyń aitýynsha, sońǵy tórt jyldaǵy resmi málimetter boiynsha "ArselorMittal Temirtaý" kompaniiasy jylyna 200 milliard teńgeden astam tabys taýyp otyrǵan, onyń basym bóligin shetelge shyǵarǵan.
"Jasalǵan eskertýlerge, ónerkásiptik qaýipsizdikke investitsiia salý, kómir óndirýdi keńeitý, barlyq óndiristi jańǵyrtý týraly kelissózder júrgizýge áreket jasalǵanyna qaramastan, kompaniia esh kelisimge kelmegen. Saldarynan osy jyldyń ózinde eki apat boldy, kompaniianyń elde jumys istegen búkil kezeńinde júzdegen qazaqstandyq qaza tapty. Myńdaǵan adam densaýlyǵynan airylyp, múgedek bolyp qaldy", - dep ashyndy depýtat.
Qalyqov Prezidenttiń "ArselorMittalmen" investitsiialyq yntymaqtastyqty toqtatý týraly tapsyrmasyn "birden-bir durys sheshim" dep atady.
"Biz adamdardyń qandai kúi keship jatqanyn bilip otyrmyz. Ókinishke qarai, eger sheteldik investor ketse, onda barlyq óndiris toqtaidy degen 90-shy jyldary bolǵan qorqynysh bizde áli de bar. Múldem olai emes. Biz kásiporynnyń jetkilikti aqsha taba alatynyn kórip otyrmyz. Kómir ónerkásibinde 30 jyldyq tájiribesi bar qyzmetker retinde qaraǵandylyqtardy sabyrǵa shaqyramyn", - dedi májilismen.
Depýtattar osy kásiporyndy óz betinshe damytý úshin elimizde kásibi kadrlar jetkilikti dep sanaidy.
"Qaraǵandy kómir basseini men bolat balqytý kombinaty strategiialyq obektiler ekenin túsinemiz. On myńdaǵan adamymyzdyń taǵdyry solarmen bailanysty. Qaraǵandy, Temirtaý, Shahtinsk jáne Rýdnyi qalalaryn eshkim tastap ketpeidi", - dep sendirdi Qalyqov.
Shahtadaǵy apattan keiin ne ózgeredi?
Aitýynsha, aldaǵy ýaqytta árbir jumysshynyń ónerkásiptik qaýipsizdigi men eńbegin qorǵaýǵa erekshe nazar aýdarylady. Ol úshin depýtattar árbir jumysshynyń eńbegin qorǵaý jónindegi zańǵa mańyzdy túzetýler ázirlep, Úkimetke jibergen.
Zań jobasynda ónerkásiptik qaýipsizdik inspektsiiasy jáne eńbek inspektsiiasy turǵysynan memlekettik baqylaýdy kúsheitý usynylady.
"Ózderińiz biletindei, qazaqstandyqtardyń qaýipsizdigi, olardyń eńbek quqyqtaryn qorǵaý artta qalyp otyr. Búginde elimizde ónerkásiptik qaýipsizdik jónindegi 260 memlekettik inspektor ǵana bar. Bul jetkiliksiz ekeni aidan anyq. Úkimet óndiristegi jumysshylardyń qaýipsizdigin qamtamasyz etý boiynsha baqylaý fýnktsiialaryn kúsheitý týraly oilanýy kerek", - dedi májilismen.
Budan bólek halyq qalaýlylary eldegi iri ónerkásiptik kásiporyndardy tekserýge moratoriidi alyp tastaityn kez keldi dep sanaidy.
Sonymen qatar qaýipti jáne ziiandy óndiriste jumys isteitin barlyq adam úshin zeinetke shyǵý jasyn tómendetý boiynsha jumys jalǵasady.
Budan basqa, depýtattar Kásibi aýrýlar jáne eńbek gigienasy institýtyna erekshe mártebe berý qajet dep esepteidi.
"Sózimdi aiaqtai otyryp, men qaza tapqan barlyq otandasymyz bizdiń esimizde máńgi saqtalady degim keledi. Prezidenttiń tapsyrmasymen ár otbasy men olardyń balalary barlyq qajetti kómekti qajetinshe alady", - dep málimdedi Qalyqov.
28 qazanǵa qaraǵan túni Qaraǵandy oblysyndaǵy Kostenko atyndaǵy shahtada metan jarylyp, saldarynan 46 kenshi kóz jumdy. Apat faktisi boiynsha qylmystyq is qozǵaldy. Premer-ministrdiń tóraǵalyǵymen úkimettik komissiia quryldy.
