Qaraǵandy oblysynda Toǵyzqudyq aýylyna jaqyn jerde túnde "Niva" kóliginiń júrgizýshisi trassada áiel adam men jeti jasar qyzdy qaǵyp ketti, dep habarlaidy Sputnik.
Qaraǵandy oblysy politsiia departamenti qyzmetkerleriniń málimetinshe, jol apaty tún ortasynda boldy. Toǵyzqudyq aýylynyń 42 jastaǵy turǵyny úiine qaityp kele jatqan. Jol shetinde áieli men qyzy bara jatypty. Olardyń tún ishinde jolda ne istep júrgenin politseiler habarlamady.
Resmi emes derek boiynsha, otbasy qonaqtan qaityp kele jatady. Áýelde rólde otaǵasynyń baýyry otyrypty. Bir ýaqytta mas er adam ashýlanyp, úsheýin de kólikten qýyp shyǵyp, ózi rólge otyrsa kerek. Áiel men qyz birneshe metr alǵa júrip ketkende, kólik júrgizýshi abaisyzda ekeýin qaǵyp ketedi. Qandai jyldamdyqpen qaqqany belgisiz. Áiel adam jedel járdem kelgenshe kóz jumsa, jeti jasar qyz jansaqtaý bóliminde dúnieden ozdy. Dárigerler onyń ómiri úshin baryn salyp kúreskenimen, alǵan jaraqattary tym aýyr bolyp shyqqan.
Qaraǵandy oblysy densaýlyq saqtaý basqarmasynyń baspasóz qyzmetindegiler mundai jaraqattardan keiin tiri qalý múmkin emestigin aitty.
"Qyz bala aýrýhanaǵa túsken kezde bas miy qatty shaiqalǵan, qoly men aiaǵy synǵan jáne denesiniń kóp bóligi syrylǵan kúide edi. Bala ózdiginen tynys ala almai, birden komaǵa tústi. Quramynda hirýrg, júike dárigeri jáne ózge de mamandar bar dárigerler toby birneshe ret konsiliým ótkizdi. Qyz balany Maiqudyqtaǵy №1 qalalyq aýrýhanaǵa jetkizgen soń, ári qarai eshbir klinikaǵa baǵyttai almadyq — jaǵdaiy tym aýyr boldy. (…) Mundai jaraqattar kishkene bala úshin ońai emes", — dedi basqarmanyń baspasóz hatshysy Aijan Isa.
Is tergelip jatyr, er adam bes jylǵa deiin bas bostandyǵynan aiyrylýy múmkin.
