QR Tótenshe jaǵdailar ministrliginiń resmi ókili Talǵat Ýáli Qaraǵandy oblysynyń Abai kentindegi shahtada 8 kenshiniń metan gazynyń qursaýynda qalǵanyn málim etti, dep habarlaidy QazAqparat.
«7 qarasha saǵat 09.30-da Qaraǵandy oblysy Tótenshe jaǵdailar departamentiniń kezekshi-dispetcherlik qyzmetine Abai qalasyndaǵy Abai shahtasynda K10 jeldetý shtregine metan gazy taraǵany týraly aqparat kelip tústi. Ishte shamamen 8 qyzmetker qalyp otyr», - dedi Talǵat Ýáli.
Oqiǵa ornyna dereý qutqarýshylar men arnaiy qyzmetkerler men tehnikalar shyqqan. Mán-jaiy men sebepteri anyqtaýlda. Qaraǵandy oblysyna Tótenshe jaǵdailar ministri attandy.
«QR Premer-Ministri Asqar Maminniń tapsyrmasy boiynsha Tótenshe jaǵdailar ministri Iýrii Ilinniń basshylyǵymen komissiia oqiǵa ornyna shyqty.
Aldyn ala aqparat boiynsha shahtada barlyǵy 64 jumysshy bolǵan. 3-K10 kenjarynda 8 qyzmetker bar (aqparat naqtylanyp jatyr). Kenjardaǵy 8 qyzmetkerdiń 6-ýy qaza boldy, eki qyzmetker jaraqat alǵan (olardyń da jaǵdaiy naqtylanyp jatyr). Qazir zardap shekken kenshilerdi shahtadan jer betine alyp shyǵý jumystary júrip jatyr», - dedi resmi ókil.
«Tótenshe jaǵdaidy joiýǵa «Kásibi áskerilendirilgen avariialyq-qutqarý qyzmeti» respýblikalyq ortalyq shtabynyń 15 qyzmetkeri, Tótenshe jaǵdailar departamentiniń 3 ókili jáne 2 tehnikasy, «Apattyq meditsina ortalyǵy» mekemesiniń 3 qyzmetkeri men 1 tehnika) jumyldyrylǵan. QR TJM deregi boiynsha, Abai qalasyndaǵy bul shahta «ArselorMittal Temirtaý» AQ-tiesili.
