Qaraǵandy oblysynda azyq-túlik barlyǵyna jetedi, al baǵa boiynsha alypsatarlyqtyń joly kesiledi. Jeńis Qasymbek qazir halyq arasynda úrei men dúrligýge jol bermeý úshin úilesimdi jumys isteý qajet ekenin aitty, dep habarlaidy "Ult aqparat".
Búgin oblys ákimdiginde iri saýda dúkenderi men bazarlardyń basshylarymen, taýar jetkizýshilermen arnaiy jinalys ótti.
«Áleýmettik jelilerde sýpermarketterde qant pen basqa da taýarlar aiaqtalǵany týraly aqparat kóp boldy. Men iri qalalardyń ákimderine taldaý júrgizip, bul málimdemelerdiń shynaiylyǵyn tekserýge tapsyrma berdim», - dedi Jeńis Qasymbek.
Qala ákimi Nurlan Áýbákirovtiń aitýynsha, jergilikti un men makaron óndirýshiler qalanyń qajettiligin tolyǵymen qamtamasyz etip otyr.
«Jetkizilip jatqan bakaleia - kúrish, qaraqumyq, tuz, ósimdik maiy boiynsha kóterme saýda oryndarynyń qory jetkilikti, jaǵdai qalypty. Keshe keibir dúkenderde qant bolmady, biraq qazir ony iri sýpermarketter arqyly tasymaldaidy. Jaǵdai turaqty, ony jiti qarastyramyz. Qaraǵandylyqtardyń aitýynsha, qalada bakaleia ónimderi boiynsha problemalar joq», - dedi Nurlan Áýbákirov.
Bul qorytyndymen saýda-sattyq salasynyń ókilderi de kelisip otyr, olar úreige sebep joq dep málimdedi. Barlyq iri sýpermarketterde azyq-túlik jetkilikti.
Jeńis Qasymbek kásipkerlerge qajet bolǵan jaǵdaida óńir biligi turaqtandyrý qorynan azyq-túlik interventsiiasyn ótkizýge daiyn ekenin jetkizdi. Qazir qorda 600 myń tonna bakaleia - kúnbaǵys maiy, qaraqumyq jáne kúrish jarmasy, un jáne qant bar. Sondai-aq, kartop, sábiz, piiaz jáne qyryqqabat qory da qarastyrylǵan.
Oblysta ai saiyn 11 myń tonna un jáne 610 tonna makaron ónimderi óndiriledi.
«Oblysta azyq-túlik qory jetkilikti. Baǵa deńgeiiniń negizsiz ózgerýi bolmaýy tiis. Bul - túbegeili másele. Bul - el Prezidentiniń tapsyrmasy. Biz alypsatarlyq suranys týyndaýy múmkin ekenin túsinemiz, sondyqtan barlyq jaýapty tulǵalarǵa jaǵdaidy qatań qadaǵalaý qajet», - dedi Jeńis Qasymbek.
Sondai-aq, oblys ákimine aimaq dárihanalarynda dári-dármektiń bar ekendigi týraly málimdeldi. Meditsinalyq dári-dármek defitsiti joq. Keshe áleýmettik dárihanalarǵa Qaraǵandy oblysynda óndirilgen meditsinalyq maskalardyń alǵashqy partiialaryn jetkize bastady. Densaýlyq saqtaý basqarmasynyń basshysy Erjan Nurlybaevtyń aitýynsha, óńir biligi kásipkerlermen meditsinalyq maskalardy kóterme baǵamen satý týraly kelisim jasady.
Jeńis Qasymbek sondai-aq sýpermarketter men saýda-oiyn-saýyq ortalyqtarynyń basshylaryna sanitarlyq talaptardy kúsheitý týraly eske saldy.
