Óńir basshysy júie quraýshy kásiporyndy taýarlar men qyzmetterdi satyp alýda jergilikti qamtýdy synǵa aldy, dep habarlaidy oblystyq ákimdiktiń baspasóz qyzmeti.
«ArselorMittal Temirtaý» bolat óndirisin jylyna 6 mln tonnaǵa deiin ulǵaitý týraly ýádesin nege oryndamady? Metallýrgter qalasynyń turǵyndary qashan taza aýamen demala alady? Qaraǵandy oblysynyń ákimi Jeńis Qasymbek kompaniia basshylyǵyna osyndai suraqtardy tótesinen qoidy.
«Sizder el basshylyǵyna jylyna 6 mln tonna bolat óndirýge ýáde berdińizder. Bul sizderdiń investitsiialyq kelisimshartyńyzda jazylǵan. Is júzinde, nátije bir jarym ese az – osy jyldyń qorytyndysy boiynsha 3,7 mln tonna bolat kútilýde. Kólem boiynsha ósip jatqan joqsyzdar! Ótken jylmen salystyrǵanda prokat óndirisi 20%-ǵa tómendedi», - dep Jeńis Qasymbek Temirtaýdyń damý áleýetin talqylaý jónindegi keńeste kompaniianyń atyna narazylyǵyn bildirdi.
«ArselorMittal Temirtaý» AQ atqarýshy direktory Vadim Basinniń aitýynsha, investitsiialyq baǵdarlama 5 mln tonnaǵa deiin túzetildi. Top-menedjer jol kartasy týraly eske saldy, onda kompaniia úsh jyl ishinde óndiristi jańǵyrtýǵa 305 mlrd teńge salýdy mindettedi.
«Biz investitsiialardyń 70%-yn sizder igergenderińizdi bilemiz. Jyl saiyn 100-105 mlrd teńge salasyzdar. Óndiris kólemin arttyrý, memleket aldyndaǵy mindettemelerdi oryndaý úshin bul jetkiliksiz ekenin kórip otyrmyz. Biz kásiporynnyń damý strategiiasyn túsingimiz keledi, eki jyldan keiin, bes jyldan keiin qansha adam jumys isteitin bolady. Jáne qalany, injenerlik, áleýmettik infraqurylymdy damytý boiynsha óz josparlaryn sáikestendirý kerek», - dedi Jeńis Qasymbek.
Óńir basshysy jergilikti shaǵyn jáne orta biznesti qoldaý boiynsha da kompaniiaǵa syn aitty. Taýarlar satyp alýǵa jumsalǵan 32 mlrd teńgeniń 900 mln teńgesi ǵana qaraǵandylyq ónim óndirýshiler úlesine tiesili – ol barlyq joǵy 3%. Oblys ákimi bul kórsetkish óte az ekenin atap ótti.
«Jumystar men qyzmetter boiynsha da jaǵdai osyǵan uqsas. 45 mlrd teńgeniń ishinde qazaqstandyq kompaniialardyń úlesi 30% ǵana quraidy. Bul rette óńirdiń shaǵyn jáne orta biznesi ónimniń úlken assortimentin usynatynyn eskersek. Biz barlyǵymyz patriottarmyz! Qazaqstandyq úlesti arttyraiyq», - dedi Jeńis Qasymbek.
Oblys ákimi jaqyn arada qalada shaǵyn jáne orta biznesti damytý boiynsha birlesken keńes ótkizýdi tapsyrdy.
Óńir basshysy kombinattaǵy apattyq ǵimarattar men qurylystarǵa qatysty máselelerdi de qozǵady. Bul óndiristegi iri apattarǵa ákeledi, dep atap ótti ol.
«Qabyldanyp jatqan sharalarǵa qaramastan, Temirtaýdaǵy ekologiialyq jaǵdai shielenisip tur. Sizder kóp aqsha salǵanyn baiandaisyz. Biraq adamdar nátije men naqty jaqsartýlardy kórmeidi», - dedi Jeńis Qasymbek.
Oblys ákimi sondai-aq JEO-2-degi uzaqqa sozylǵan jańǵyrtý jóninde da aitty. Óńir basshysy jobany júzege asyrýdy tezdetýdi talap etti.
