Qaraǵandy oblysynyń ákimi Erlan Qoshanov 4 shahtanyń kenjaryna túsip, 154 kenshini jer betine shyǵýǵa kóndirdi, dep habarlaidy "Ult aqparat" oblys ákiminiń baspasóz qyzmetine silteme jasap.
«12 jeltoqsan 14.00-de Qaraǵandyǵa «ArselorMittal SNG» bas direktory Paramjit Kalon Qaraǵandy oblysynyń ákimi Erlan Qoshanovpen kezdesýge keldi. Kompaniianyń usynǵan sharttaryn talqylaý 23.00-de aiaqtaldy. Sodan soń aimaq basshysy «ArselorMittal Temirtaý» AQ atqarýshy direktory Vadim Basinmen birge shahterlerge attandy», delingen habarlamada.
Ákimdiktiń baspasóz qyzmetiniń habarlaýynsha, 00.30-da Erlan Qoshanov Shahtinsk shahtasynyń kenjaryna túsken. Eki saǵattyq kelissózden keiin jer betine 59 adam kóterildi. Tentek shahtasynda kezdesýden soń 76 adam jer betine shyqty.
«03.00-de Tentek shahtasynda Erlan Qoshanov «ArselorMittal Temirtaý» AQ shahtalary direktorlarynyń, kásipodaqtar jáne brigadirlerdiń qatysýymen jinalys ótkizdi. Munda taǵy bir márte kenshilerdiń talaptary men kompaniianyń usynystary talqylandy», - dep atap ótti ákimdikte.
Sondai-aq 04.00-de ákim Lenin shahtasyna kelip, kenjarǵa túsip, kenshilermen júzdesken. Kezdesýden soń 19 adam jer betine kóterildi.
«06.00-de ákim Qazaqstan shahtasyna túsip, onda da kenshilermen kezdesti. Kelissózder jalǵasýda. Nátijesinde 13 jeltoqsan tańerteńgi saǵat 8-ge deiingi ýaqytta jer betine 154 kenshi kóterildi», - dep habarlady oblys ákiminiń baspasóz qyzmeti.
Munymen qosa, áleýmettik jelilerde Shahtinskide qamaýǵa alý jaǵdailary oryn alǵany týraly málimet taraǵan. Bul aqparatqa qatysty Qaraǵandy oblysynyń Ishki ister departamentiniń baspasóz-qyzmeti Shahtinsk qalasynda eshqandai tutqyndaý jáne qamaý amaldary júrgizilmegenin málimdedi. Politsiia qyzmetkerleri azamattarǵa jalpy dúrbeleńge boi bermeýlerin suraidy.
