Qaraǵandy oblysynyń qutqarýshylary Tórtkól sý qoimasyna batyp ketken balyqshynyń máiitin tapty. Er adamnyń denesi jaǵadan 500 metr jerden tabyldy, dep habarlaidy QazAqparat.
10 qazanda birneshe adam Buqar jyraý aýdanyndaǵy Tórtkól kóline balyq aýlaýǵa shyqqan. Er adamdardyń biri qaiyqqa minip, al qalǵan dostary jaǵalaýda balyq aýlaǵan. Ózi jalǵyz qaiyqpen ketken balyqshyny joldastary sońǵy ret keshke kórgenin aitady. Biraz ýaqyttan soń ony izdeýge shyqqan. Alaida taba almaǵan. Kelesi kúni tańerteń 11 qazanda balyqshylar dosyn taba almai, qutqarýshylarǵa habarlasqan.
«Izdeý jumystarynyń birinshi kúni arnaiy top balyqshynyń aýdarylǵan rázińke qaiyǵyn tapty. Búgin qutqarýshylar sýǵa batyp ketken adamnyń denesin jaǵadan 500-600 metr qashyqtyqtan tapty», - dep málimdedi Qaraǵandy oblysynyń TJD baspasóz qyzmeti.
Qutqarýshylar azamattarǵa sý aidyndaryndaǵy qaýipsizdik erejelerin eske salady.
- Jazataiym oqiǵalardy boldyrmaý úshin balyq aýlaǵanda jaǵalaýdan alys ketpegen jón;
- Sý aidynyna shyǵar aldynda qaiyqtyń jai-kúiin muqiiat tekserý qajet, onyń zaqymdanbaǵanyna, eskekteriniń aqaýsyz ekenine kóz jetkizińiz;
- Qaiyqta ár adamǵa arnalǵan qutqarý sheńberi, belbeýi nemese keýdeshesi bolýy mindetti;
- Daýyldy aýa raiy kezinde sýǵa shyǵýǵa tyiym salynady.
