Qaraǵandy oblysynyń TJD «Qazgidromet» filialymen birlesip Nura jáne Sherýbai-Nura ózenderiniń joǵarǵy aǵysynda qardy qaita ólshep jatyr. Bul sharalar kóktemgi sý tasqynynyń aldyn alý maqsatynda júrgizilýde, dep habarlaidy "Ult aqparat".
Qar ólsheý marshrýtynyń alǵashqy kezeńi qańtar aiynda uiymdastyrylǵan. Onyń qorytyndysy boiynsha Nura ózeniniń basseininde ylǵal qory normadan 23%-ǵa, Sherýbai-Nura 23%-ǵa, Keńgir 49%-ǵa, Sarysý 14%-ǵa, Toqyraý 38%-ǵa tómen ekeni anyqtaldy.
Nura ózeniniń basseininde topyraqtyń qatý tereńdigi 63-ten 150 sm-ge deiin jetken.
«2021 jylǵy sý tasqyny kezeńine daiyndyq 2020 jyldyń jazynda bastaldy. Qaraǵandy oblysynyń 33 eldi mekeniniń aýmaǵynda 22 shaqyrymnan astam qorǵaý bógetteri men jal turǵyzyldy jáne nyǵaityldy, ózen arnalarynyń sý tasqyny qaýpi bar ýchaskelerinde 12 shaqyrym aýmaq tereńdetildi, jaǵalaýdy nyǵaityldy, arna tazalanyp, keńeitildi, 9 shaqyrym sý burý arnalary salyndy jáne jóndeldi, 65,5 shaqyrym drenaj jáne sý burý júieleri tazartyldy, 74 ýchaskeniń sý ótkizý qabileti joǵarylatyldy», - dep málimdedi Qaraǵandy oblystyq TJD baspasóz qyzmeti.
2015-2020 jyldar aralyǵynda oblysta barlyǵy 220 shaqyrymy qorǵanys bógenderi men jal turǵyzylyp, nyǵaityldy, 173 eldi mekende 76 shaqyrym ózen jaǵalaýy nyǵaitylyp, túbin tereńdetilip, arnasy keńeitildi.
2021 jyldyń qańtar aiynan bastap Samarqand jáne Yntymaq qoimalarynan sanitarlyq sý aǵyzý jumysy júrgizilip keledi. Búgingi tańda aǵyzylatyn sýdyń kólemi 5 jáne 8 tekshe m/sek jetti.
Aimaqtyń sý tasqyny qaýipti ýchaskelerinde áýeden baqylaý júrgizilip jatyr.
2021 jyly oblystyń halqyn, aýmaǵyn jáne sharýashylyq júrgizýshi sýbektilerin tasqyn sýdan qorǵaý jónindegi is-sharalar jospary ázirlendi. Josparda uiymdastyrýshylyq jáne praktikalyq sharalardyń barlyq kesheni qarastyrylǵan.
