Skrinshot:polisia.kz videodan
Qaraǵandy oblysynda jyl basynan beri zańsyz ainalymnan 14 mlrd 750 mln teńge kólemindegi bir tonnadan astam esirtki tárkilenip, 45 adam ustaldy, dep habarlaidy Ult.kz IIM-ge silteme jasap.
Ishki ister ministrliginiń aqparattyq media-portaly habarlaǵandai, Qaraǵandy oblysynyń politsiiasy aýqymdy "Qarasora-2025" operatsiiasy aiasynda esirtki ainalymyna qatysty quqyqbuzýshylyqtardyń aldyn alý jáne jolyn kesý boiynsha júieli jumystardy jalǵastyrýda.
Qaraǵandy oblysy PD bastyǵynyń birinshi orynbasary Ábil Ábildinniń aitýynsha, qazirgi ýaqytta negizgi qaýip sintetikalyq esirtkilerden týyndap otyr. Óńirde olardyń tárkilengen kólemi 590 kilogramǵa jetken. Tárkilengen zattardyń basym bóligi mefedron men alfa-PVP quraidy.
Zańsyz ainalymǵa túspegen esirtkiniń jalpy quny 14 mlrd 750 mln teńgeden asady, bul shamamen 30 mln AQSh dollaryna teń.
«Operativtik is-sharalardyń nátijesinde esirtki biznesine qatysy bar 45 adam ustaldy, olardyń arasynda 13 uiymdastyrýshy men esirtki taratýshylar bar. Tergeý barysynda qylmystyq jolmen tabylǵan 560 mln teńgeden astam qarjyny zańdastyrǵan, óńiraralyq bailanysy bar uiymdasqan qylmystyq toptar áshkerelendi», – dedi Ábil Ábildin.
Sonymen qatar oblys aýmaǵynda esirtkini jarnamalaityn jeti myńnan astam graffiti-jazý joiylyp, osyndai jarnamalardy taratqan úsh adam ustaldy.
Buǵan deiin Astanada 33 jastaǵy áiel esirtki taratý kúdigimen ustalǵan bolatyn. Politsiia dereginshe, sol túni ol alǵashqy “tapsyrmasyna” shyqqan.
Almatyda da bir er adam esirtkiniń zańsyz ainalymyna qatysy bar degen kúdikke ilindi. Onyń telefonynan esirtki jasyrylǵan oryndardyń sýretteri tabylǵan.
Jetisý oblysynda esirtki tasymaldady degen kúdikpen Almaty qalasynyń 22 jastaǵy turǵyny ustaldy. Boijetken túnde taksimen Taldyqorǵanǵa birneshe túiinshekpen bara jatqan.
