© Photo: QR TJM baspasóz qyzmeti
Qaraǵandy oblysynda «ArselorMittal Temirtaý» AQ-nyń Kostenko atyndaǵy shahtasynda qaza bolǵan kenshiler sany ósti, qutqarýshylar shahtadan taǵy tórt azamattyń denesin tapty, - dep habarlaidy "Ult aqparat" Tótenshe jaǵdailar ministrliginiń baspasóz qyzmetine silteme jasap.
Vedomstvo málimetinshe, saǵat 15:00-degi jaǵdai boiynsha 42 adamnyń denesi tabylyp, 4 kenshini izdeý jalǵasyp jatyr.
"Avariiany joiý jónindegi respýblikalyq jedel shtabtyń basshysy, Tótenshe jaǵdailar ministri, general-maior Syrym Sháriphanov shahtaǵa tústi. Órt tutanǵan jáne kenshilerdiń qaza bolǵan jerlerine tekserý júrgizildi.
Avariiany joiý jónindegi jedel shtab táýlik boiy izdestirý-qutqarý jumystaryn úilestirip jatyr. Eń qaýipsiz jáne kenshiler bolýy múmkin yqtimal ýchaskeler boiynsha taý-ken qutqarýshylarynyń ótý joldary pysyqtalýda.
Izdestirý jumystary bir-birinen shamamen 4 km qashyqtyqta ornalasqan eki óndirý ýchaskesiniń aýdanynda júrgizilip jatyr" - delingen habarlamada.
Vedomstvo málimetinshe, taý-ken qutqarýshylary qajetti jabdyqtarmen jáne bailanys quraldarymen qamtamasyz etilgen. Sondai-aq gaz jaǵdaiyn baqylaý jalǵasyp jatyr.
"Izdestirý-qutqarý jumystaryna «Kásibi áskerilendirilgen avariialyq-qutqarý qyzmetteriniń respýblikalyq ortalyq shtaby» JShS Qaraǵandy filialynyń 55 taý-ken qutqarýshysy jáne 15 tehnikasy jumyldyryldy.
Al shuǵyl meditsinalyq kómekti qamtamasyz etý úshin 21 adam jáne 7 birlik jedel meditsinalyq járdem tehnikasy jumyldyryldy.
Budan basqa, TJM jáne Qaraǵandy oblysynyń TJD-da respýblikalyq jáne oblystyq jedel shtabtar jumys isteidi" - delingen habarlamada.
