Foto: ©️ Tengrinews.kz / Turar Qazanǵapov
Qaraǵandy oblysynda 15 jastaǵy oqýshy zorlanyp, keiin psihiatriialyq ortalyqqa túsken, - dep habarlaidy Tengrinews.kz agenttigi.
Kámeletke tolmaǵan qyzǵa 50 jastaǵy er adam jynystyq zorlyq-zombylyq kórsetken. Jábirlenýshiniń anasynyń aitýynsha, tergeý uzaqqa sozylǵan, al qyzy tipti psihiatriialyq ortalyqqa jatqyzylǵan.
Bul jaǵdai biyl shildeniń aiaǵynda boldy.
"Jazda qosymsha jumys tapqym keldi. Ol (kúdikti - esk.) qurbym arqyly maǵan jumys usyný úshin qurbym jumys isteitin kafege shaqyrdy. Eshteńeden kúdiktengen joqpyn. Ol sol jerde birneshe bótelke syra iship, aqsha tóleý úshin úige barý keregin aitty. Maǵan ózimen birge barýdy, sodan keiin oralyp, bárin talqylaýdy usyndy. Kelistim, biraq meni onda ne kútip turǵany oiyma da kelmedi. Páterde ol maǵan tiise bastady, basymnan eki ret uryp, zorlady. Aiqailaýdyń paidasy joǵyn jetkizdi. Sodan keiin eshkimge eshteńe aitpaýdy ótindi. Óz ómirim úshin qorqyp, onymen keliskendei keiip tanyttym. Onymen birge páterden shyqqannan keiin qurbyma hat jazyp, aǵam men dosynan kómek suradym", - dedi jábirlenýshi.
Jábirlenýshi politsiiaǵa da júginipti. Kúdikti oqiǵadan birneshe saǵat ótken soń ustaldy.
"Saraptama jasady, qyzymnyń denesinen onyń biomaterialy anyqtaldy. Soqqy izderi de anyqtaldy. Biraq is áli sotqa jiberilgen joq. Nege, ol jaǵy bizge túsiniksiz. Qadaǵalaýshy organ ókili qandai da bir sebeptermen qyzymdy psihiatriialyq ortalyqqa ornalastyrýdy talap etti. Politsiia bóliminde osy ortalyqqa salýǵa kelisim berýge májbúr etti, bul ortalyqtyń qorytyndysynsyz ony (kúdiktini - esk.) otyrǵyzbaidy dedi. Sodan keiin ǵana aýrýhanaǵa jatqyzýdan bas tarta alatynymdy bildim. Bes kúnnen keiin qyzymdy ol jerden alyp kettim. Osy kúnderi ortalyqta psiholog onymen bir-aq ret sóilesipti", - dedi jábirlenýshiniń anasy.
Jábirlenýshiniń týystarynyń sózinshe, tergeý nátijesine áser etý úshin qyzdaryn esi durys emes dep tanyǵysy keledi.
Qaraǵandy oblysy Densaýlyq saqtaý basqarmasynyń baspasóz qyzmeti málimetinshe, kámeletke tolmaǵan qyz sot-psihiatriialyq saraptama komissiiasynyń usynysy boiynsha anasynyń jazbasha kelisimimen balalar psihiatriia ortalyǵyna jatqyzylǵan.
"Tekseris kezinde naýqas meditsina mekemesiniń rejimi men erejelerin saqtamady. Qajet psihologiialyq tekseristerdi aiaqtamai, anasynyń talabymen aýrýhanadan merziminen buryn shyǵaryldy", - delingen vedomstvo málimetinde.
Qaraǵandy oblysy Politsiia departamentiniń baspasóz qyzmeti ókili bul oqiǵaǵa qatysty pikir bildirip, jábirlenýshi anasynyń jazbasha kelisimimen psihiatriia ortalyǵyna ornalastyrylǵanyn málimdedi.
"Osy derekke qatysty QR Qylmystyq kodeksiniń 120-babynyń 3-bóligi boiynsha qylmystyq is tirkeldi. Kúdiktige qatysty qamaýda ustaý túrinde bultartpaý sharasy tańdaldy. Tergeý júrgizilip jatyr", - dedi Qaraǵandy oblysy Politsiia departamentiniń baspasóz qyzmeti ókili.
