Qaraǵandy oblysynyń Saran qalasynda «Yutong» jolaýshylar avtobýsyn shyǵaratyn jańa zaýyt ashylady. "Ult aqparat" bul týraly QR Indýstriia jáne infraqurylymdyq damý ministrliginiń baspasóz qyzmetine silteme jasap habarlaidy.
«Burynǵy rezeńke-tehnikalyq buiymdar zaýytynyń bazasynda jumys isteitin kásiporyn óz óndirisin biylǵy jyldyń jeltoqsan aiynda iske qosady. Investitsiialyq jobany iske asyrý úshin joba operatory «Qaztehna» JShS, «Saryarqa «ÁKK» AQ jáne «Yutong» kompaniiasynyń qatysýymen birlesken kásiporyn quryldy. Investitsiia kólemi 37,7 mln AQSh dollaryn qurady. Zaýyt jylyna shamamen 1200 birlik avtobýs shyǵarýdy josparlap otyr. Bul, birinshi kezeńde-aq tozyǵy jetken qoǵamdyq kólik parkiniń jaǵdaiyn aitarlyqtai ózgertýge múmkindik beredi», - delingen habarlamada.
Sarapshylardyń málimetinshe, búgingi tańda elimizdegi 12 myńnan astam avtobýstyń tozyǵy jetken, olardyń 50% astamy múlde eskirgen.
«Yutong» - bul jolaýshy tehnikasyn jetkizýshi álemdegi iri kompaniialardyń biri. Onyń álemdik naryqtaǵy úlesi – 15%, al Qytai naryǵyndaǵy úlesi 37% quraidy. «Yutong» avtobýstarynyń jyldyq satylymy 70 myń birlikke teń, al jańa energetikalyq avtobýstardyń kórsetkishteri jylyna 25 myń birlik bolady. Sondai-aq, indýstriialyq aimaq aýmaǵynda jobalardy iske qosý otandyq mamandar úshin 600 jańa jumys ornyn (aralas salalardy eskere otyryp) qurýǵa múmkindik beredi», - dep málim etti QR IIDM baspasóz qyzmetinen.
Budan bólek, Saran qalasyndaǵy zaýyt jol-qurylysynda qoldanylatyn kólikter men júk tehnikasyn shyǵaratyn bolady. Ónim sapasy Qazaqstannyń ónerkásiptik jáne taý-ken óndirýshi kompaniialary arasyndaǵy suranysqa jaýap beredi. Jalpy, jylyna 400 birlik arnaiy tehnika shyǵarý josparlanǵan. Qaraǵandy zaýyty aldaǵy ýaqyta elimizden bólek, Resei, Qyrǵyzstan, Iran, Pákistan jáne basqa da elderge ónim eksporttaýdy kózdep otyr.
Eske sala keteiik, Qaraǵandy oblysynyń avtobýs parkin 2022 jylǵa deiin 50% jańartý josparlanýda. Bul týraly Jolaýshylar kóligi jáne avtomobil joldary basqarmasynyń basshysy Askerbek Haltonov Instagram-da tikelei efirde málimdegen bolatyn.
