Qaraǵandy oblysynda 21, 19 jáne 15 jastaǵy úsh jigit sýǵa ketti. Qutqarýshylar eki máiitti Qýsaq ózeniniń túbinen alyp shyqty. Sýǵa batyp ketken taǵy bir jigit Keńgir sý qoimasynan tabyldy, dep habarlaidy QazAqparat.
14 mamyr saǵat 12:00-de dispetcher pýltine Qoshqar aýylynan ońtústikke qarai 3 shaqyrym jerde Qusaq aýyldyq okrýginde 2001 jyly týǵan jas jigit pen 2007 jyly týǵan jasóspirim joǵalyp ketkeni týraly habarlama kelip tústi.
«Izdeý jumysyna 86 adam, 29 tehnika jáne 2 júzý quraly jumyldyryldy. Saǵat 12:35-te jergilikti turǵyndar 2001 jyly týǵan marqumnyń denesin ózennen taýyp aldy. Qaza tapqan ekinshi adamnyń máiitin qutqarýshylar 17:55-te 6 metr tereńdikten alyp shyqty. Oqiǵanyń mán-jaiy anyqtalyp jatyr», - dep habarlady Qaraǵandy oblysy TJD baspasóz qyzmeti.
Taǵy bir qaiǵyly oqiǵa Jezqazǵan qalasynda Keńgir sý qoimasynda boldy.
«Spýtnik» saiajaiy aýmaǵynda qutqarýshylar sýdan 2003 jyly týǵan jas jigittiń denesin alyp shyqty.
Qaraǵandy oblysynyń TJ departamenti óńir turǵyndaryna shomylý maýsymy áli bastalmaǵanyn eskertedi.
