Foto: Freepik
Qaraǵandy oblysynyń ákimi Ermaǵanbet Bólekpaev Kostenko atyndaǵy shahtadaǵy apattan zardap shekkenderdiń jaǵdaiy týraly aitty, dep habarlaidy Sputnik Qazaqstan.
"Búgin tańerteńgi jaǵdai boiynsha zardap shekken 27 adam meditsinalyq mekemelerde dárigerlerdiń baqylaýynda. Bir kenshiniń jaǵdaiy aýyr deýge bolady, 24-niń jaǵdaiy ortasha, qalǵan eki naýqastyń jaǵdaiy qanaǵattanarlyq. Barlyq patsient qajetti meditsinalyq kómek alyp jatyr", - dedi Bólekpaev Úkimet otyrysynda.
Ákimniń aitýynsha, qaza tapqan árbir kenshiniń otbasyna memlekettik organdardyń basshylary men depýtattar bekitildi. Olar jerleý rásimderine qatysyp, tiisti tólemderdi baqylaidy jáne turmystyq problemalardy sheshedi. Jerleý rásimderin ótkizýge, kólikpen qamtamasyz etýge qajetti kómek kórsetilýde.
Sondai-aq basqa óńirlerden, alys-jaqyn shet elderden týystary men jaqyndarynyń kelýine kómek kórsetilýde.
"Qaza tapqan kenshiler otbasylarynyń áleýmettik portreti jasaldy. Kópbalaly otbasylar, jalǵyz asyraýshysy jáne kámeletke tolmaǵan balalary bar otbasylar anyqtaldy. Qaza tapqandardyń ipotekalyq jáne basqa da nesieleri, turǵyn úi jaǵdailary týraly aqparat jinaldy", - dedi Bólekpaev.
Oblys ákimi kenshilerdiń otbasylary kómeksiz qalmaidy dep sendirdi.
