Qaraǵandy oblysynda Land Cruiser kóligi poiyzben soqtyǵysty, dep habarlaidy «QTJ - Júk tasymaly» AQ baspasóz qyzmeti.
Oqiǵa 3 naýryz kúni saǵat 05:40 shamasynda Qaraǵandy - Sorokovaia ýchaskesinde bolǵan. Aýmaq kúzetiledi jáne temirjol ótpesinde dabyl júiesi jumys istep turǵan.
«Land Cruiser avtokóligi poiyzben soqtyǵysty. Poiyzdyń mashinisti shuǵyl tejegishti basqanymen, tym jaqyn aralyqtan soqtyǵystyń aldyn alý múmkin bolmady. Zardap shekkender joq», - delingen habarlamada.
Aldyn ala málimetke sáikes, avtokólik júrgizýshisi óreskel túrde jol erejesin buzyp, jaqyndap qalǵan poiyzdyń aldynda temir jolǵa shyǵyp ketken.
«Jyl basynan beri kólik júrgizýshileriniń keselinen temirjol ótkelderinde soqtyǵysýdyń úsh jaǵdaiy tirkeldi. 2018 jyly dál osyndai 10 jaǵdai oryn aldy. «QTJ - Júk tasymaly» AQ temir joldy kesip óterde avtokólik ielerine abai bolýǵa shaqyrady», - delingen habarlamada.
