Qaraǵandy oblysy «jasyl» tehnologiialarǵa kóshý boiynsha aýqymdy jumystardy bastady.
Saran qalasynda Ortalyq Aziiadaǵy eń iri dep tanylǵan kún elektr stantsiiasy jumys istei bastady. 164 gektar aýdanda 307 myń voltaikalyq panelder ornalastyrylǵan. Olar kún energiiasyn elektr qýatyna túrlendiredi, dep habarlaidy Qaraǵandy oblysy ákimdiginiń baspasóz qyzmeti.
«Elbasy bizdiń aldymyzǵa 2030-shy jylǵa deiin balama energiia úlesin 30% deiin ulǵaitý týraly mindet qoiǵan edi. Endi mine búgingi tańda sol maqsatqa jetý úshin úlken qadam jasap otyrmyz. Búgin iske qosylyp otyrǵan kún elektr stantsiiasy 100 megavatt óndiredi. Sizder onyń qýattylyǵyn túsiný úshin bul energiia Saran sekildi 10 qalany qýatpen qamtýǵa jetetinin aitqym keledi. Oblysta jalpy qýattylyǵy 90 megavatt bolatyn taǵy osyndai 2 kún elektr stantsiiasy salynyp jatyr», dedi Erlan Qoshanov.
Sarandaǵy elektr stantsiiasynda ornatylǵan panelder metall qorshaýy joq kún batareiasynyń sońǵy býyny. Osynyń arqasynda olardyń ústine qar jinalmaidy, al jańbyr olarǵa esh ziian keltirmesten jerge aǵyp ketedi.
Aita ketý kerek, bultty kúnderdiń ózinde panelder 10-15 megavatt qýat óndiredi. Panelderdi paidalaný merzimi 40 jyl.
KES ol tolyqtai jekemenshik joba. Investorlar retinde eýropalyq kompaniialar toby shyǵyp otyr. Olar jobaǵa 137 mln. AQSh dollaryn salǵan. Panelderdiń anaǵurlym tiimdi jumys isteýi úshin Saranda arnaiy túrde jańa qosalqy stantsiia salyndy jáne barlyq elektr jelileri qalypqa keltirildi.
Stantsiianyń iske qosylý saltanatyna qatysqan QR Energetika ministri Qanat Bozymbaev investorlardy tek kún energiiasyn shyǵarý óndirisine ǵana toqtalyp qoimai, sonymen birge jel elektr stantsiiasyn salýǵa shaqyrdy.
Qaraǵandy oblysynyń ákimi Erlan Qoshanov atap ótkendei, óńirimizde 1 trln teńgege 33 iri investitsiialyq joba júzege asyrylyp jatyr. 17 joba sheteldik investitsiialardyń qatysýymen, jáne de olardyń keibiri Qazaqstanmen seriktesip qyzmet etýdi jalǵastyrǵysy keletinderin atap ótken. Osylaisha, mysaly, stantsiiany ashqan kúni Eýroodaq investorlary Qaraǵandy oblysy ákimdigimen memorandýmǵa qol qoidy. Biznesmender aldaǵy jyldary balama energiia kózderin damytýǵa 500 mln. AQSh dollaryn investitsiialaýǵa daiyn ekenderin jetkizdi.
«Bul qarajatqa biz «jasyl» energetika salasynda taǵy 3-4 iri nysandardy salýdy josparlap otyrmyz. Biz eýropalyq áriptesterimizge birqatar jobalar usyndyq, jáne jergilikti bilikpen jemisti eńbek etetinimizge senimdimiz, sebebi munda investorlar úshin barlyq jaǵdai jasalǵan», - deidi «Sonnenergie» AQ investorlar tobynyń ókili Ian Zonnenshain.
Jańa kásiporyndardy iske qosý, investorlardyń aitýynsha, Qaraǵandy oblysynda júzdegen jańa jumys oryndaryn ashýǵa múmkindik beredi.
